2012年10月29日星期一

Miss,我哋祝福妳...

詭異之處係早幾日凌晨醒一醒,突然諗起呢件事...

學生緣呢家嘢真係好睇運氣,唔係話單憑你和藹可親就會有學生黐埋嚟,有啲時候即使你再努力,學生都係會唔領情。

話說當年讀中學嗰陣有個miss,俾人嘅感覺好古怪,成日用佢獨特嘅口吻對住我哋講「miss好鍾意你哋,想同你哋傾多啲偈」,但每次都係零feedback,因為根本冇人想同佢傾。


某日傳來佢喺屋企唔知點樣整到隻手指尾斷骨嘅消息,對於佢嘅遭遇,我深表同情,但佢之後用咗一整堂時間同我哋講述整親嘅過程同感受(當中並不包含有意義嘅人生道理),全個班房充斥住陰森嘅氣氛,真係可以歸類做奇聞。重點係差唔多落堂嘅時候...

Miss:你哋要祝福miss快啲好番,大家一齊喺 心入面 講「miss,我哋祝福妳」...
全班:...................................................................
Miss:你哋做乜唔出聲?一齊講,miss,我.哋.祝.福.妳...(引領全班一齊朗讀tone)
全班:搣...時...我...哋...祝...福...妳......

[Picture captured from YouTube - Happy Tree Friends - Halloween-A-Thon]

2012年10月19日星期五

偷歌賊


近年大眾為「應否立法規管二次創作」鬧得火紅火熱,有機構強調二次創作會對原作造成經濟損失,應該全面禁止。首先,以上言論不代表本人立場;第二,奇怪在明明非法下載先係令版權持有人蒙受損失嘅一個最大因素,點解呢啲人唔去處理一下,反而走去干涉二次創作呢啲閒事?

總係聽到有人話因為冇錢買唱片,所以就走去非法下載。喂,咁你冇錢開飯會唔會去百佳偷米?有人會答,米係必需品所以要俾錢都買,但唱片唔係,咁既然唔係必需品,冇錢的話就更加唔輪到你享用啦,冇錢仲有咩資格學人享受?同樣道理,手緊嘅日子可以做嘅就只有日日食叉燒飯(必需品),斷估你唔會入去五星級酒店食buffet(非必需品),食完之後拒絕俾錢啩!

我又聽過一個講法,話一隻唱片未必隻隻歌都啱聽,所以唔買唱片。冇辦法架喎,呢個係一個package deal,好難避免架喎!又用buffet做例子,食物好好味,但侍應服務態度未達水準,埋單嗰陣你又會唔會以產品某部份(侍應嘅服務)唔合心意為由唔俾錢?

最後一個藉口,亦係最荒謬嘅一個藉口,就係download者將成個責任歸咎於現今樂壇啲歌唔好聽!唔好聽你又走去download!係咪思覺失調?

大家可曾試過「白做」?明明付出咗整份心機去做好一份工作/一件事,但到最後得唔到合理嘅回報?

我相信再差嘅歌手都花過心機同時間去錄一張唱片,作曲嘅、填詞嘅都要收人工,唱片公司上上下下嘅同事都需要開飯,購買正版唱片(或者用合法軟件聽歌)會係對佢哋最基本嘅尊重。更重要嘅係,非法下載令唱片銷量每況愈下,當出唱片再唔係賺錢嘅途徑,歌手們統統淨係走去登台同拍電影,到時仲邊會有新歌聽?即使歌手本身對唱歌有再大嘅熱誠,有邊個會咁大方次次都倒貼心機倒貼錢去製作新歌俾大家聽?香港樂壇有幾多個鄧穎芝?

[Picture grabbed from San-X Facebook Page (edited)]

2012年10月9日星期二

營養對話

話說同事手持學生證,喺Page One買嘢有折,適逢而家差唔多又係買schedule嘅時候,於是朝早打咗去就近嘅銅鑼灣Page One睇下想要嘅嘢出咗未...

11:40am
我:請問你哋返咗2013年嘅schedule未?
職員:返咗喇!
我:有冇《Bunny Suicides》?即係嗰隻兔呀!(連忙補充話係嗰隻兔,因為驚唔係個個都識佢)
職員:Ummmm...我要幫你check下先,一係先生你留個電話,我轉頭覆番你!
我:(留咗名同電話)
職員:好,我幫你check下。先生係要《Bunny Suicides》嘅schedule嘅。(極流暢)
我:係呀,唔該!


11:50am
職員打嚟話我聽record冇,但又唔知會唔會返貨喎。我正想開口問之際佢話不如有貨的話再打俾我。

1:30pm
職員再打嚟!話啱啱返貨,仲主動提出話幫我留三日,因為貨量唔多!

呢啲服務真係一百分!首先,成間Page One咁多product,一講product name就知咩事,唔駛我再解釋已經係加晒分!第二就係幾次都係我未出聲,職員就即刻提出最有效嘅解決方法,完全冇廢話,真係thumbs up呀!

同場加映-
沒有營養的對話

友人Traver拎住《Concert YY》黃偉文作品展DVD,面對住連埋talk一共97個track嘅曲目,佢話...

Traver:嘩,唱咗幾耐呀?!
我:夾埋六場剪輯出嚟架...

之後佢指住封面嘅黃偉文...

Traver:即係佢真係唱得好聽嘅?
眾人:...........................................................


[Pictures grabbed from The 2011/2012 Calendar of Bunny Suicides]

2012年10月7日星期日

留住腎臟

隨住年紀增長,開始對偏甜嘅食物產生抗拒。對比起以前無甜不歡,有甜則要更甜嘅飲食習慣真係好唔同,以前食西多會係咁落糖漿,食燒肉會不停點砂糖,依家連食早幾年都仲鍾意緊嘅brownie都嫌太甜...


不過我對鹹呢一種味道依然鍾愛(尤其係淮鹽),我對鹹味嘅底線基本上係冇極限。話說有一日嫲嫲話屋企樽淮鹽係佢自己整嘅,我好自然地擺出咗一副好雀躍嘅表情(對住老人家係要誇張啲),跟住佢話:「好易整咋嘛,我教你整啦!」

我心諗千祈唔好,我識整的話真係不得了,太方便到手我會失控地係咁落,到時好快就可以同腎臟講拜拜。
Related Posts Plugin for WordPress, Blogger...