2010年，鍾一憲推出首支個人單曲《明明》，外間反應麻麻，唱片公司眼見佢一人難橕大局，最後決定買餸搭棵蔥，自此佢就孖住麥貝夷以情侶檔姿態演出，但仍然係半紅不黑，除咗《勾手指尾》之外，相信再冇人講得出佢哋任何一首歌名。
一再翻聽佢哋嘅歌，其實studio版唱得唔差(雖然女方唱live嘅水準飄忽得可怕，但楊千嬅都開得成演唱會啦，仲有邊個唔可以做歌手？)，旋律仲要係幾好聽架喎，咁究竟點解啲歌hit唔起呢？
罪魁禍首係唔合格嘅歌詞，拖累晒佢兩個。以新歌《犯眾憎》為例，作曲同編曲都做得好好，聽過一次我已經曉得哼成首歌，可惜歌詞彷如小學生作文，寫完一堆重點，之後夾硬砌啲字落去令其成文。歌詞中更夾雜住好多類似「玩完」、「走了寶」等唔算口語，但又未去到文采飛揚嘅用詞，導致成首歌處於口語同書面語之間，用詞性質嘅唔一致令歌迷無所適從。
再細心嘴嚼歌詞，會發現一啲好現代化嘅潮流用語。一開始已經殺出一句「他，並未太緊我，我都知道」，「緊我」其實即係「緊張我」嘅濃縮版，平時都唔多聽到人咁樣講，今次好明顯係因為填詞人詞窮，為咗砌字而放落去。Bridge嘅一句「你別再葡萄」成功將歌迷帶到去高登討論區，「葡萄」屬高登用語，取自「吃不到的葡萄是酸的」，屬動詞，有「妒忌」嘅意思。始終呢啲字眼未被廣泛使用，我相信唔係個個都會知道佢哋嘅意思，如果放喺歌入面，首歌發放出嚟嘅訊息又點會被廣泛地接收？定係製作單位嘅target audience只係呢一少撮人？更重要嘅係成首歌係文筆欠佳嘅書面語做base，但又夾雜住口語同潮語，嚴格嚟講根本有三種語言喺度，令成首歌欠缺統一性，一啲都唔順口。
亂塞歌詞其實同亂唱加走音冇分別，始終每句歌詞都係出自歌手自己把口，歌曲質素直接影響歌手留俾人嘅印象，唔係走嘩眾取寵嘅路線，但又冇優美嘅歌詞做情歌嘅賣點，賣點只得瑯瑯上口嘅曲調，除咗吸引到一班書都未讀完，仲會買《YES!》嘅學生哥、學生妹之外，仲會吸引到邊個欣賞？你估十年後仲會唔會有人記得《犯眾憎》呢隻歌？
未達水準嘅歌曲都可以推出市場，難怪香港越嚟越少街知巷聞、老中青都識唱嘅流行歌。除咗歌手本身嘅演繹同唱片公司嘅宣傳之外，旋律同歌詞都係相輔相成，任何一個元素做得唔好都有可能拖垮成首歌。如果鍾一憲想憑呢類賣點欠奉嘅歌曲喺云云歌手中突圍而出的話，除咗喺社交網站繼續發佈男男親密照之外，睇嚟真係要諗諗計。
[圖片擷取自BighonorHK's YouTube Channel]
