喺地鐵見到一個著住恤衫牛仔褲，拎住生日蛋糕，貌似二十出頭嘅男仔準備甩鞋帶。
掙扎咗一陣應唔應該同佢講，畢竟三九唔識七，個情況多少都會有啲尷尬。但如果我唔出聲，佢好有可能會因自踏鞋帶而五體投地式仆喺度，生日蛋糕亦會飛墮地上變成屎餅。此時情況將會更尷尬，接下來嘅生日party亦會因佢嘅不幸而失去切蛋糕嘅歡樂...
最後我急步行前，用我部電話篤佢背脊兩下，將呢件咁重要嘅事話咗俾佢知。
如我所料佢喺俾唔切反應嘅情況下講咗句「唔該」。我嘅任務終於完成。
一刻古怪嘅氣氛，換來我嘅安心，同時避免咗當事人出醜於人前，算係一個化算嘅交易。
[Picture grabbed from WarnerBros.com]
