若要人不知細時唔讀書

大家有冇收過一啲完全睇唔明嘅英文message？

大概係因為而家科技太發達，大家每日都忙住Facebook、WhatsApp、Line、微信、Instagram、YouTube、myTV、蘋果動新聞、Angry Birds、Coin Dozer...仲要用美圖秀秀整下photo grid，加下effect，忙到打message嘅時間都所餘無幾，迫於無奈要用英文打message。

得！英文咋嘛，只要唔係深到要查encyclopaedia嘅字眼，我睇得明嘅！

初時我真係天真到以為會睇得明，但原來我錯喇。雖說耳濡目染，我會擔心有一日我會打出「I am live Hong Kong」一類句子，但我仍然可以接受文法上有錯，前置詞(preposition)亂咁用，畢竟都只係一個好casual嘅傾偈對話，冇必要搞到個氣氛咁緊張(有時自己都會用錯啦)。但當去到一個地步，當事人用英文去講一啲自己根本冇能力用英文表達到嘅句子，我就覺得難以接受...

唔係歧視佢英文差，而係我．真．係．睇．唔．明！

我係一個曉得從上文下理推斷出對方意思嘅人，小至spell check引致嘅錯字，大至「gm」同埋「hru」一類懶人密碼，我統統都破解到，但對住一啲根本唔能夠歸類做英文嘅「英文」，我為自己嘅無能為力感到難過，就好似你永遠唔會明白隔嚟屋隻狗Bobby汪汪叫究竟係講緊咩一樣，即使Google Translate或者係Yahoo!知識+都唔會幫到你！

某日，好朋友突然間對住我講：「你英文咁好！」呢一番過獎言論殺我一個措手不及，完全俾唔到反應。幾秒鐘後我連忙澄清，之所以有人覺得我英文好，係因為我將唔夠好嗰一面掩蓋住啫！唔識表達的話，一係就打中文，再唔係咪(暗啞底)查字典囉！

每個人嘅背景都唔同，我唔會睇低英文唔好嘅人，亦唔會用學歷去衡量同唔同一個人做朋友，但好老實講句，去到力有不逮嘅情況，點解唔用番自己最有把握嘅中文？正所謂獻醜不如藏拙，將自己嘅缺點收埋唔係正常人嘅天性咩？

當打核突英文嘅人覺得打中文好唔方便嘅時候，我想話，其實要消化一系列非常人能夠理解嘅爛英文比起慢慢打中文更嘥時間，尤其係當一段文字進化到只有作者先能夠理解嘅地步，如果作者唔開恩用中文解釋一下，我諗呢個將會變作一個永遠都解唔開嘅謎。

[圖片來源：Englishtown每日英語課程]

看不懂香港口語的讀者請按此

放低電話

呢個世界上總會有啲其煩無比，但你同佢又唔係熟到值得俾佢煩嘅人。

仲記得幾年前喺MSN遇過呢類人，話說當時我開咗MSN之後行開咗，呢個人咁啱走嚟hi我，佢見我冇答，之後連續send咗五、六個(唔記得exactly幾多個，總之有多冇少)message俾我，內容包括「hi」(again)、「here?」、「busy?」同埋來電震動等等。重點係我只不過係離開咗三分鐘，去咗個洗手間。冇應就梗係行開咗或者busy緊架啦，同埋我只不過係行開咗三分鐘，你話我三個鐘都係online mode但又唔應你就話啫，更何況人哋要唔應你的話，你send一百個嘅下場都係一樣架啦。

WhatsApp嘅情況仲堪虞，無限上網嘅普及令到某啲人覺得你廿四小時都應該作好覆message嘅準備。情況同MSN大同小異，叫完你見你唔覆又會繼續send嘢過嚟，如果見到你「last seen」個時間update咗就仲大鑊，會怪你做乜睇咗唔覆，講到你好似千古罪人，非接受死刑不可咁。

明明只係撩水吹，咩事搞到仲urgent過死人冚樓咁？其實我當時可唔可以係同朋友食緊飯、趕緊出門口、返緊工、或者係瞓緊覺，所以先至冇作出即時回應？

呢類人之所以chur得咁交關，全賴一班無時無刻，唔理場合都拎住部電話撳撳撳嘅人將佢哋縱壞晒。

其實我真係唔明白，好地地約出嚟食餐飯，點解要拎住部電話不停撳？老實講，如果話有其他約會要處理，行開講個電話，或間中覆一、兩個message，我絕對理解，但成餐飯都開住個WhatsApp，甚至開埋Facebook睇updates兼留言，其實有冇考慮到其他朋友嘅感受？成餐飯要其他人望住你撳電話，會唔會有啲唔尊重？定係expect成檯人都係拎住部電話Facebook送飯？咁唔駛出嚟啦，各自各買外賣返屋企，開住個電視望住部電話咪得囉，駛鬼特登搵個好地方坐好啲，食好啲咩！

人類之間嘅感情靠溝通維繫，最切實嘅溝通方法莫過於面對面嘅交流，如果有呢個機會都唔把握，反而停留喺虛擬世界入面，我敢講發達嘅科技會將人類嘅關係拉到最疏離。定還是你只係在乎Facebook上面有幾多個「like」？

適當嘅時候放低電話，會發現呢個世界有更多比WhatsApp吹水同Facebook開心share更有意義嘅人同事等住你去欣賞、等緊你去做。

[原圖來自Google Play]

看不懂香港口語的讀者請按此

睡夠十二小時去赴約

瞓咗十二個鐘嘅精靈樣！

講樣嘢俾大家知，假如第二日約咗人，之前嗰晚可以的話，我會特登早啲走去瞓，養足精神去玩。

一定會有人好疑惑咁問：駛唔駛咁誇張呀？

其實咁樣係一個尊重。喺精神狀態欠佳嘅情況之下同朋友食飯飲嘢，食得開心咩？人哋講完一番說話，你要用兩倍嘅力量去消化，之後再攪盡腦汁嘔個回應出嚟，好辛苦啫！成餐飯有意無意咁發放住一個「好眼瞓，快啲食完走人」嘅訊號，人哋見到都唔開胃啦。全程陷入渾沌狀態，講不出半句有意思嘅話來，肉體喺度但靈魂失蹤，相信對方都寧願你早啲返屋企好好休息。

更嚇人嘅係帶住疲倦嘅身軀去唱K，試過瞓得唔夠，聲都開唔到，每首歌完結之後心裡面都不禁問自己「嘩，我頭先唱緊乜？」難為朋友要成晚聽住自己唱到好似技安咁，就算人哋唔介意(或者不幸地人哋天生唱得更難聽)，自己都覺得好肉酸！再者，想唱又唱唔到，成晚有心無力，最尾冇癮嗰個咪又係自己！

所以話，其實除咗gel頭、化妝等等儀容上嘅準備之外，精神上嘅準備都係一個對約會嘅專重。