要靠幻想：伍樂城幻想國度作品演唱會

過去一個禮拜忙到抽筋，今日先有時間寫...

一個吃力不討好嘅作品展。

首先，點解個台可以反光反到咁？勁到對眼望完個台之後會好似Samsung啲mon咁有烙印...

第二，個rundown仲散過《星光熠熠耀保良》，陳慧琳突然走出嚟唱咗首《星期五檔案》，之後快歌環節宣佈結束，Kelly跌入無間道。

第三，《最愛演唱會》做opening絕對make sense，但點解呢首經典中嘅經典要畀個o靚妹唱一忽，之後Kelly唱得嗰少少？另外，何嘉莉係其中一個得到最大同最多掌聲嘅歌手，可惜只係唱得半首加半首...街知巷聞hit到震嘅作品唱得嗰半首，冇人識嗰啲就成首上(仲要係唔好聽架喎)，想點？

(Off topic：細個嗰陣都好鍾意聽何嘉莉唱歌，覺得佢係勁嘢，買過佢嘅碟，而家英皇成日重出以前嘅碟，唔知幾時輪到佢呢？)

第四，詭異嘅間場音樂應該係想配合主題營造「imagination」嘅感覺，但同啲歌完全唔夾。好幾次以為之後有快歌，點知原來係假象。

第五，第一次現場聽Twins唱live，原來佢哋唱live係差過楊千嬅嘅！唱咗好耐，真係完全唔好聽，忍唔住開電話更新出面黑雨同又一城水舞間嘅消息...

最後，點解唔請Sammi嚟唱《宿命主義》架？

結論係冇下次。唔係下次開我唔去睇，而係應該開唔到第二次。

推介位：
星期五檔案(陳慧琳)、非份之想(何嘉莉)、兩種人(何嘉莉)、合久必婚？(李克勤)、宿命主義(鄭秀文，呢part我憑imagination幻想出嚟嘅)

[何嘉莉照片來源：蘋果日報]

同場加映

這個世界有很多戀人

前奏響起...

J：咦，R鍾意嗰首歌喎~
D：咩呀？
Q：《就算世界無童話》...
D：呢首係《離家出走》呀！Janice嘅就問我啦！(不屑mode)
衛蘭：♪ 這個世界有很多戀人 ♪
Q：呢首係《愛才》囉！

兩條友喺度製造混亂...

硬膠女店員第四集－月費計劃

第三集：硬膠女(男)店員第三集－聖誕大餐

今次係鄉音男職員。

話說PCCW又打嚟R我續約(手提電話4G月費計劃)。個男人鄉音極重，唔講真係會以為係+86打嚟...

鄉: 而家我哋會幫你做番個續約優惠，每個月月費$174就可以有四豬服務... (佢真係講「四豬」架)
我: 埋單$174？包咗隧道費嗰啲未？
鄉: Er...未包隧道費...
我: ..........咁埋單即係幾多錢？
鄉: 連埋隧道費每個月$186...
我: 咁我而家每個月其實畀緊幾多錢? (我真係唔記得)
鄉: $186...

資料圖片 | 攝於2006年1月

我: ..........咁即係同以前冇分別
鄉: 我哋會包十gig數據...
我: 我而家係無限架喎... (我清楚明白而家已經冇無限plan，但聽到個$186 vs $186優惠之後我真係唔想再同佢講嘢，所以是但答佢算數)
鄉: 先生你應該冇留意《蘋果日報》之前發佈嘅「公平使用政策」，其實而家如果你用過咗五gig的話，你嘅速度會變番二豬...

「公平使用政策」會唔會係《蘋果日報》發佈呀！條友係咪亂嚟架！去到呢度我已經冇興趣再同佢講落去，惟有打發佢收線再等佢哋第三次打嚟。

另外有冇人可以提供到手機月費R折攻略？P記係咪$186已經係最抵？要平係咪真係要轉去傳聞中收得好差嘅電訊數碼？

每日大事記 (下)

上集：每日大事記 (上)

相信UDiary只係一個小本經營嘅網站，寫咗幾個月，網主Hero突然間話要搬server(如果我冇記錯)暫停一個月，結果一停就停到今日。UDiary年代嘅終結令我無奈咗好一陣子，因為要轉地方係一件好麻煩嘅事，更重要嘅係我唔係日日有backup我啲日記，結果後期嗰十幾篇跌晒落黑洞...

最後，我決定轉投ShowHappy嘅懷抱。ShowHappy初期，已經開始識得screen走啲冇人想知嘅嘢，例如嗰日食過啲咩(雖然一日食三包薯片又真係幾值得寫埋落去嘅)，又或者係同邊個喺行過一個幾普通嘅商場呢類無聊嘢。到中期開始識得從感覺出發去寫嘢，曉得揀一啲非常開心(/唔開心)嘅事出嚟再elaborate一下，當然唔少得加歌下詞兼且bold埋重要嗰幾句(人生必經階段呀)，亦開始加BGM落自己個blog度，印象中第一首放嘅歌好似係《世界之最(你願意)》... 同期亦畀我搵到Photobucket呢個咁偉大嘅網站，日記開始變得圖文並茂，有朋友相、情人相、貓相、零食相、gag相，甚至我爺爺都出現過。後期互聯網發展一日千里，Photobucket唔再有小器嘅容量限制，日記嘅相因此變大，去台灣、去長洲同去Kelly演唱會嘅相有幾張係大大張架！另外不得不提嘅係我畀咗幾廿蚊做ShowHappy嘅VIP，目的係整走頁頂嘅廣告，務求整到個blog靚靚仔仔。可惜有一排ShowHappy個server成日出問題，有時幾經辛苦打完篇日記竟然可以save唔到咩都冇晒，加上眼見Blogger嘅配套同界面好似完善得多，於是做咗一個好大嘅決定－轉blog，轉咗嚟呢度。

其實喺ShowHappy較後期嘅時候，已經開始寫「關於自己」以外嘅嘢，會有朋友講錯嘢嘅金句，會有「給愛搖頭的華納高層之十萬個為什麼」一類懶係抱打不平，講晒大道理嘅文章。不經不覺間，大家撳入嚟嘅地方已經由「日記」變咗做「blog」。大家入到嚟，未必可以知道筆者做過啲咩，知道嘅反而會係筆者想做啲咩，同埋諗緊啲咩。Blog入面少咗自己同朋友嘅私人嘢，例如大家唔會再見到Josephine呢個名瘋狂地出現，亦唔會有意無意知道我某個ex住喺邊度，blog自此可以被公開喇。心態同以前相反，以前慌死人知道自己個blog address，好似天機不可洩露咁，而家由記敘文變做一種分享，反而覺得越多人睇越好。

科技發達，時代進步得太快，Facebook嘅方便令會坐定定，認真諗下自己想寫乜嘅人越嚟越少，各類型嘅blog處於準備被淘汰階段，Xanga壯烈地成為第一件犧牲品。今時今日眼見Facebook嘈喧巴閉，真真假假乜都share一餐，都係閂電腦早啲瞓為妙。

一樣米養百樣人．對話篇

#1
話說要幫人買earphone，於是去咗星際，是但入咗一間舖頭。

店員：隨便睇~有冇話想搵啲乜嘢？

我：我自己睇睇先...

跟住我隨即行埋去堆earphone度(背向店員)。

店員：你係Android用定係iPhone用架？

我：Android...

之後靜默咗幾秒，但我又聽唔到腳步聲喎，即係阿店員唔係行緊出嚟幫我啦！於是我擰轉面...

......

............

..................

佢喺度玩緊手機...

#2
路人甲(問佢同行嘅朋友)：「匯豐銀行」個「豐」字點寫呀？

我心諗：你冇嘢下話，呢啲咁大路嘅字唔可能唔識寫/唔記得點寫架喎...

同行嘅朋友：「蘇民峰」個「峰」嘛~

#3
距離朗豪坊幾個街口嘅小巴上...

我(大聲)：司機，最近朗豪坊應該喺邊度落呀？

司機(大聲)：朗豪坊囉！嗰度有站！

半分鐘後...

一個一直冇聽緊歌冇玩緊手機冇瞓緊覺嘅乘客：朗豪坊有落！

去驗耳啦！

#4
講緊分手原因...

路人甲：佢一腳踏兩船。

路人乙：佢係同你拍緊拖嗰陣定係散咗之後先一腳踏兩船？

#5
晚上嘅越棧...

客人：唔該可唔可以畀啲花生醬我呀？

我心諗：吓？晚市食咩要花生醬？就算tea time都好似淨係得河粉，冇多士架喎！

店員(無奈地行埋去)：先生你係要咩話？

客人(手持點串燒嘅sauce)：Er，我想要多啲花生醬...

店員：哦...沙嗲醬...

硬膠女(男)店員第三集－聖誕大餐

第二集：硬膠女店員續集－冇汁撈麵

終於有男店員出場。

其實呢間嘢嘅食物同環境真係唔錯，本想聖誕前夕約三五知己再去食餐聖誕飯，但又唔想食overpriced嘅聖誕大餐...

我：請問你哋23號有冇散嗌menu？定係淨係做聖誕set？
硬：我哋 主要 都係做聖誕set...

主要？咁係咪會有次要？係咪仲有得散嗌？

我：咁即係有冇得散叫？
硬：要睇下到時點...

到時會因應咩因素決定？大廚心情？天氣？當日恆指走勢？

我：咩叫「到時點」？咁我而家book 23號咁嚟到有冇得散嗌？
硬：......冇...

一早答冇咪得囉！嘥口水！

我：咁最近23號幾時仲有得散嗌？
硬：我哋嗰排都係做聖誕set...

咁嗰排即係邊排呀大佬？

我：咁即係幾多號之前有？
硬：你 預20號到 啦...

20號到，即係會有落差啦。仲要加多個「預」字，即係落差上再會有落差。

我：你不如俾個確實日子我好唔好？20號到即係幾多號？
硬：20號。
我：咁即係我20號之前就仲有得散嗌，係咪？
硬：係！

距離聖誕節仲有廿五日，距離我查詢嘅23號仲有廿三日，距離店員所講嘅20號仲有二十日，統統都唔夠一個月，好似仲未準備好咁。

為賺錢淨係接聖誕set，對散嗌嗰班客reject咪reject囉，所有嘢都仲係50/50、睇情況、大概，邊有可能唔專業到俾個uncertain嘅答案個客！咁基本嘅對答都唔識，執咗佢啦好冇？

Miss，我哋祝福妳...

詭異之處係早幾日凌晨醒一醒，突然諗起呢件事...

學生緣呢家嘢真係好睇運氣，唔係話單憑你和藹可親就會有學生黐埋嚟，有啲時候即使你再努力，學生都係會唔領情。

話說當年讀中學嗰陣有個miss，俾人嘅感覺好古怪，成日用佢獨特嘅口吻對住我哋講「miss好鍾意你哋，想同你哋傾多啲偈」，但每次都係零feedback，因為根本冇人想同佢傾。

某日傳來佢喺屋企唔知點樣整到隻手指尾斷骨嘅消息，對於佢嘅遭遇，我深表同情，但佢之後用咗一整堂時間同我哋講述整親嘅過程同感受(當中並不包含有意義嘅人生道理)，全個班房充斥住陰森嘅氣氛，真係可以歸類做奇聞。重點係差唔多落堂嘅時候...

Miss：你哋要祝福miss快啲好番，大家一齊喺 心入面 講「miss，我哋祝福妳」...
全班：...................................................................
Miss：你哋做乜唔出聲？一齊講，miss，我．哋．祝．福．妳...(引領全班一齊朗讀tone)
全班：搣...時...我...哋...祝...福...妳......

[Picture captured from YouTube - Happy Tree Friends - Halloween-A-Thon]

營養對話

話說同事手持學生證，喺Page One買嘢有折，適逢而家差唔多又係買schedule嘅時候，於是朝早打咗去就近嘅銅鑼灣Page One睇下想要嘅嘢出咗未...

11:40am
我：請問你哋返咗2013年嘅schedule未？
職員：返咗喇！
我：有冇《Bunny Suicides》？即係嗰隻兔呀！(連忙補充話係嗰隻兔，因為驚唔係個個都識佢)
職員：Ummmm...我要幫你check下先，一係先生你留個電話，我轉頭覆番你！
我：(留咗名同電話)
職員：好，我幫你check下。先生係要《Bunny Suicides》嘅schedule嘅。(極流暢)
我：係呀，唔該！

11:50am
職員打嚟話我聽record冇，但又唔知會唔會返貨喎。我正想開口問之際佢話不如有貨的話再打俾我。

1:30pm
職員再打嚟！話啱啱返貨，仲主動提出話幫我留三日，因為貨量唔多！

呢啲服務真係一百分！首先，成間Page One咁多product，一講product name就知咩事，唔駛我再解釋已經係加晒分！第二就係幾次都係我未出聲，職員就即刻提出最有效嘅解決方法，完全冇廢話，真係thumbs up呀！

同場加映－

沒有營養的對話

友人Traver拎住《Concert YY》黃偉文作品展DVD，面對住連埋talk一共97個track嘅曲目，佢話...

Traver：嘩，唱咗幾耐呀？！
我：夾埋六場剪輯出嚟架...

之後佢指住封面嘅黃偉文...

Traver：即係佢真係唱得好聽嘅？
眾人：...........................................................

[Pictures grabbed from The 2011/2012 Calendar of Bunny Suicides]

硬膠女店員續集－冇汁撈麵

相關文章：硬膠女店員

事件一

呢兩日係咁咳，前一晚嘅藥氣又未消，揀嘢食必須以唔太刺激同埋開胃為大前提。

我：呢個「泰式鴨胸撈麵」係咩汁架？

店員A：冇汁，呢個係撈麵嚟！

我：咁你都要有汁先撈到架@@

店員A：我幫你問問...

事件二

我：想問UA咭同朗豪坊咭邊張抵啲呀？(我記得好似有分別)

店員B：今日冇折...

我：吓？上次都有架喎，都係禮拜日嚟食lunch...(好肯定)

店員B：戲飛今日冇折...

我：我係話UA嗰張會員咭...
- - - - - - - -
其實今次嗰兩位店員嘅態度係OK嘅，店員A仲幾有禮貌添，只係唔知點解好似食咗安眠藥未瞓醒咁...

同埋作為樓面，餐牌嘅食物落咩汁，辣唔辣呢啲係要知架！

[Picture grabbed from http://chibimaru.tv/]

鄭融小故事兩則

再見鄭融

「Neway Music Live x 鄭融」20:25開始。

21:45，鄭融唱完「最後一首歌」《紅綠燈》之後，音樂未完，燈未開，隊band未走，啲人就拂袖離去。正當坐喺我隔嚟嗰兩個人起身準備走人之際，竟然有工作人員行埋嚟叫佢哋「坐多一陣先」！但最尾啲人都係雞咁腳咁走淨一成...

陰公，《終生學習》都未唱:o)

假如何韻詩是杜麗莎

唱罷《假如》一曲，鄭融話：「呢首係我師傅嘅歌...」

鄰座嘅女人同佢老公講：「佢話係何韻詩架喎。」

請驗耳同埋翻聽經典粵語流行曲。

Miss V的憂慮

Miss V的憂慮 (上集)
電話響...
V(看似好緊急)：「我有樣好urgent嘅嘢要問你！」
我：「嗯？」
V：「Google Maps咪有街道實景圖，影住條街個環境嘅...」
我：「係呀！」
V(非常認真)：「我想問係咪即時架？」

Miss V的憂慮 (下集完結篇)
我：「唔係囉！一早影咗架喇...」
V(仍然堅持係會有live update)：「即係會有delay嘅！因為我個老細勁仆街，我驚佢check我呀！」
我(無奈忍笑)：「個街景係唔會無啦啦有update架囉...」

Miss V，如果Google真係要整個世界性360度CCTV，我諗要耗資唔知幾多百萬先至搞得掂喇，仲要考慮到私隱等等嘅問題...

[圖片來源：Google Maps]

鐳射

呢張圖真係能解百般愁。

到藥房曬相

同大家講四個小故事。

食咗飯未

升降機內，師奶A同師奶B雞啄唔斷。

師奶A：食咗飯未呀？
師奶B：未呀...
(轉話題，講咗兩、三句其他嘢)
師奶A(又問)：食咗飯未呀？
師奶B：未呀...

佢又真係面不改容照答架喎！

襯衫美學

喺The One睇中咗一條短褲，猶豫緊買唔買。

我：都唔知襯咩鞋好...
Sales：其實你而家呢對都OK呀，不過唔好係呢隻色，要襯啲暗啲嘅顏色！

咁即係呢對唔OK啦！

到藥房曬相

入到去，個男人問有咩幫到我。

我話：我想曬相...

會唔會crossover得太勁？！

巧令令～＊

食糖水，服務員好好禮貌。

我：頭先落單嗰個人叫做「李巧玲」...
Derek：嘩，巧京京呀...

(扮)熟客之46號客人

終於叫到45號飛，即刻行埋去向經理報到。殊不知有個貌似年過三十，手持46號飛嘅OL攝喺我前面，咩料呀，我咪大大聲講咗45號喺度囉，人哋都未叫到你...

被安排坐喺一邊長梳化，一邊擔凳仔嗰啲檯。隔嚟檯埋單，46號客人同佢娘親被安排坐喺我隔嚟檯。佢捉住經理傾咗一陣，懶熟咁，但聽落又唔覺佢哋真係好熟。

食完飯佢哋兩母女迫埋喺梳化嗰邊，手持iPhone擺到明就係準備搵人影相。有位女店員經過，好醒目咁問佢哋係咪要幫手，點知阿女話「唔係呀，唔係呀」，女店員無奈地行開。

我都估佢係想搵(佢以為)同佢好熟嗰位經理幫佢影，世事真係好奇秒，不出兩秒經理真係路過，阿女當然把握呢個咁好嘅機會，叫經理幫佢影。

此時手頭上冇嘢急緊嘅經理九秒九地叫住啱啱行開嘅女店員：「阿妹阿妹...呢度要影相呀...」

最後兩母女惟有認命，唔通同個經理講「妖，我叫你幫我影呀」咁咩。

P.S. 身處現場好笑十倍。

到Zurich找尋單眼皮帥哥

同Amy分享咗一個有單眼皮靚仔嘅廣告，大家喺電話入面研究緊佢係咩地方嘅人。見到阿客嘅head office locates喺Zurich，但一時間又醒唔起Zurich喺邊樹喎。

我：Zurich即係邊度呀？
Amy：哦，好似係一間公司名嚟架...
我：唔係囉，係一個地方囉！
Amy：下？我記得有間公司係呢個名架喎...
(此時對方已經喺電話另一邊成功搜尋「Zurich」)
Amy(言之鑿鑿)：咪係(公司名)囉~蘇黎世保險嘛~~~


View Larger Map

[Picture grabbed from IPAAT@Panoramio]

生意難做

講咗幾十萬次我淨係需要打出同打入就已經可以，仲硬係要sell每月$146，合約期24個月嘅「eye家居平板電腦」。

好地地喺屋企做乜要用嗰舊嘢睇蘋果東方啫，我開電腦咪咩都有囉，出街對住部電話仲嫌隻眼唔夠辛苦咩。我修飾咗以上一番話婉拒咗。

之後阿顧客服務員竟然同我講話「呢部平板電腦有無限數據架喎」。

面對佢呢個selling point，我爭啲接唔到落去。我咪話咗唔會用囉，唔用的話數據限制仲係我嘅concern咩？！？！其實佢態度唔差，但佢似乎真係死唔斷氣，我唯有無奈地答：「其實，我屋企上網都係無限架囉...我相信你屋企都係架可？」

我好想話佢知我巴不得成個屋企電話cut鬼咗佢，仲同我講增值服務！

黃伊汶佛法無邊感化收數佬

東方日報 12/10/2008

黃 伊 汶 （ Emme ） 近 個 月 不 斷 受 到 追 數 電 話 滋 擾 ， 遭 粗 口 喪 鬧 ， 高 峰 期 每 日 來 電 四 十 次 ， Emme 則 以 播 佛 經 和 關 懷 問 候 ， 成 功 令 追 數 佬 知 難 而 退 。

黃 伊 汶 （ Emme ） 近 日 被 收 數 公 司 追 債 港 幣 1200 元 ， 並 日 夜 來 電 以 粗 口 騷 擾 。 昨 日 致 電 Emme 求 證 ， 她 坦 言 被 追 數 佬 每 日 來 電 四 十 幾 次 「 問 候 」 和 追 債 ： 「 其 實 係 我 家 菲 傭 為 同 鄉 做 擔 保 ， 同 鄉 走 佬 後 ， 追 數 公 司 於 是 打 電 話 騷 擾 ， 污 言 穢 語 梗 有 ， 最 初 我 家 菲 傭 關 咗 電 話 鈴 聲 ， 但 其 實 掩 耳 盜 鈴 ， 我 決 定 要 正 視 和 解 決 呢 件 事 。 」

消 除 怨 氣
Emme 親 自 接 聽 追 數 佬 來 電 ， 與 對 方 對 質 ， 解 釋 事 件 與 自 己 無 關 ， 亦 勸 對 方 不 要 浪 費 時 間 去 追 數 ， 建 議 他 做 有 意 義 的 事 情 ， 例 如 傳 道 ： 「 佢 講 乜 都 夾 雜 一 大 堆 粗 口 ， 咁 嘅 表 達 能 力 ， 反 映 佢 生 活 好 有 問 題 ， 所 以 我 去 同 佢 傾 偈 。 （ 成 功 嗎 ？ ） 唔 成 功 ， 所 以 我 改 為 播 佛 經 畀 佢 聽 ， 希 望 減 低 怨 氣 ， 結 果 播 咗 十 幾 次 之 後 ， 無 再 打 電 話 嚟 。 」 雖 然 追 數 佬 沒 有 再 來 電 騷 擾 ， 但 似 乎 不 是 Emme 的 怪 招 奏 效 ， 而 是 債 仔 的 家 人 出 面 解 決 。

文 ： 專 案 組
- - - - - - - -
睇咗咁多次都仲係覺得好好笑...

現實版Draw Something之POOP

同朋友喺尖沙嘴睇衫。店員嘅style有啲似糖妹，即係cute cute地，講嘢細細聲嗰啲，但冇咗糖妹嗰一份作狀同低能。

一入去已經見到佢個飯盒上面畫咗篤屎喺度，我懷疑係佢同事/朋友/男朋友玩得Draw Something太多所以不期然周圍畫。搞咗一大輪，朋友試緊衫嘅時候，翻版糖妹先驚見糞便塗鴉曝光。

佢故作輕鬆咁拎起檯上面嘅marker，偷偷地喺飯盒上面畫咗幾筆，企圖令上面嗰篤屎消失。

我想講其實我見到晒成個過程...

14:56AM，耶穌問幾點

你高分過我，或者係因為你英文比我好；我高分過你，或者係因為我放字放得有技巧。一場遊戲，贏定係輸其實唔重要，最緊要係玩得暢快。

我唔介意對方渣過自己，自問唔係做每一件事都攞足一百分，但我有啲介意對手係腦殘嘅...

話說前排喺「Words with Friends」搵咗個random user同我玩，佢個username係「xxxxxxxxxxjesus」。當時我已經心諗，咩料呀，耶穌你都搞...

呢個人係咁亂放啲字，不斷為我開路。OK，即使原來你屎過我咁多，我依然好俾心機去玩，雖然我心存疑問佢究竟係咪真係識玩...

一早已經大比數拋離，突然間，假耶穌send message俾我！就憑以下呢段對話，我可以肯定佢真係腦殘之士。

大佬呀！1456點樣可以係AM呀？

常人對腦殘，最後常人以487對204勝出！多謝！

硬膠女店員

我搵唔到一個比「硬膠」更貼切嘅形容詞。

對於呢間甜品店嘅食物，我只會講一句麻麻，今次想同大家分享佢哋嘅服務。

事件一

餐牌喺朋友手上，我唯有空口講白話...

我：我要嗰個荔枝...白酒凍...
女店員：咩嚟架？

我只係講漏咗兩個字，我要嘅係「荔枝啫喱白酒凍」。佢個樣又唔似第一日返工喎！

事件二

朋友發現有隻匙羹上面有粒4mm x 4mm嘅黑色嘢，於是同女阿店員講...

朋友：隻羹污漕架喎，可唔可以換咗佢？
女店員：哦！嗰啲唔係污漕，係墊匙羹嗰塊膠甩出嚟架...

之後全檯六個人同埋女店員靜止咗三秒鐘。

朋友：咁你可唔可以幫我換咗佢？
女店員：真係唔係污漕嚟架喎！(到此時佢仲未有意欲收咗隻羹)
朋友：咁你都幫我換咗佢啦！

最後換番嚟嗰隻都係有嘢黐住喺度...

事件三

22:02落單，其中一位朋友叫咗個N年陳皮紅豆沙，22:24阿女店員行埋嚟話冇晒紅豆沙！

啲糖水擺咗喺對面商廈迷你倉架咩？要用廿二分鐘先確認到紅豆沙賣晒？

事件四

正所謂好戲在後頭，另一位朋友叫嘅心太軟直到22:37埋單都仲未嚟。

男店員心知咩事，講咗唔好意思，同時叫阿女店員叫廚房取消咗個心太軟...

女店員(同廚房講)：10號檯個心太軟唔要喇！
廚房(因為遠所以細聲)：點解？(仲要問囉)
女店員(當住我面問男店員)：點解喎...(竟然真係會傳話囉)

................................................................................................................................................................................................................................................................................................................................................................................................

為咗慳番大家嘅時間，我嗌入廚房：因為已經等咗八個字喇！
最後阿女店員再向廚房補充：因為已經等咗八個字喎...

旺角溏苑女店員－請俾趣。

發緊夢

開年飯局上有五個人，當中包括朋友阿實同埋佢爸爸。

叫咗一個二人餐(包甜品桂花糕)再加幾碟餸。

實爸爸：套餐嘅桂花應該得兩舊架咋喎，駛唔駛叫多一碟？
Traver：唔駛啦，我唔食椰青架！