陳慧嫻激情盛放亞細亞巡迴演唱會廣州站後感

慧嫻姐姐為廣州亞運會演唱主題曲《亞細亞》，並藉今次演唱會再戰樂壇，仲要係國語樂壇。前者真係令我R爆頭，究竟點解會搵佢唱？後者係報紙講o既，唔知真定假，我只希望唔好好似2008年咁雷聲大雨點小，但眼見今次演唱會o既吉位多到數唔到，真係不得不叫人擔心。

今次演唱會唱o既都係一o的耳熟能詳，由我一出世就陪住我長大o既經典金曲，包括《紅茶館》、《千千闕歌》、《跳舞街》同埋《傻女》等等。對於45歲o既慧嫻姐姐o黎講，今次演出雖然偶有失準，但都算唔錯。

有少許可惜o既係慧嫻姐姐年紀開始大，冇以前咁好中氣，部份高音位唱得好吃力；另外就係間唔中會有甩beat情況出現，不過呢樣o野唔怪得佢，因為個ear mon塞得唔實，成日甩以致佢根本聽唔到音樂，細心留意下其實演唱會下半part o既時候，佢不時要用手gum住個ear mon。不過冇所謂啦，班觀眾俾錢入場都唔係聽歌o既，耐唔耐就有人走來走去買o野飲，個大叔無啦啦又走到我面前同後五行個阿姐講o野…慧嫻姐姐唱得再落力，某部份觀眾都唔係欣賞緊。罕有地我又冇好炆喎，因為我知道自己身處o係大陸－一個冇文化o既地方。

估唔到o係慧嫻姐姐o既演唱會上仲可以搵到驚喜－發夢都估唔到佢會唱《玩味》！呢首係慧嫻姐姐咁多作品當中其中一首最愛，過去佢都好少現場演繹呢首歌，但今次竟然有得聽！開心到不得了呀！另外值得一讚o既係快歌medley部份，慧嫻姐姐唱得出奇地放，一路跳舞一唱都冇唔夠氣o既情況出現，勁！

總括o黎講都係一個我覺得幾好睇o既演唱會。如果觀眾們可以投入o的，合作o的就好喇，因為慧嫻姐姐唱《情意結》o係最尾「離開的戀人都，都會，像命運纏綿我…」o個陣遞o左個咪俾大家，跟住冇人接！搞到好尷尬好慘！（我有少許自責點解我冇大嗌「一世」幫佢接落去…）

加油呀慧嫻姐姐！我信你呢個巡迴會越唱越好o架！

陳慧嫻激情盛放亞細亞巡迴演唱會廣州站
－2010年7月24日
夜機
人生何處不相逢
月亮
去吧！

明日有明天
Joe Le Taxi
我寂寞
孤單背影
情意結
奇妙旅程

披星戴月/Jealousy/Dancing Boy/不羈戀人
儂本多情
情人
你怎麼捨得我難過
我終於失去了你
歸來吧

花店
今天的愛人是誰
玻璃窗的愛/今天夜裡總下雨/痴情意外
玩味
謝謝你的愛

亞細亞
地球大追蹤/跳舞街/變、變、變變變/貪、貪、貪
Love Me Once Again
紅茶館
飄雪

逝去的諾言
與淚抱擁
傻女
千千闕歌

quincyluk 26/07/2010