請．不要．棄掉雜誌

公司個清潔阿姐真係好有趣。

話說我每次掉雜誌o既時候都會o係相關地方貼上一張寫住「不要」字眼o既A4紙以茲識別。

尋日為o左方便自己做o野，我放o左兩疊書o係垃圾桶側邊。其實之前阿姐都唔會掉我放o係垃圾桶側邊o既o野（包括我用o黎裝鼻涕紙o既紙皮箱，我唔記得寫「不要」佢都唔掉！），但我臨走都係唔放心，於是寫o左張紙貼o係其中一疊書上面：「請不要棄掉雜誌！」

本打算highlight住「不要」兩個字，又怕阿姐睇o的唔睇o的以為真係不要，於是都係唔搞咁多o野。

「請不要棄掉雜誌！」

今朝返到o黎，貼住溫馨小提示o既一疊雜誌唔見o左。