好人

短短o既十五分鐘，發生o左三件令我覺得少許感動既事。

第一件事發生於樓下大家樂，我撞到樓上o既鄰居同佢娘親。
其實本身諗住買o野食，但眼見前面有六、七個人，加上已經有一定數目o既人等緊拎野食，通常呢o的情況都一定要久候十五分鐘以上，所以我都係去新星買$22叉燒飯算數，慳錢慳時間。
我禮貌地拍一拍阿鄰居話我走先，點知驚動了娘親。
我只係講o左句『好多人要等好耐』，跟住auntie竟然話『唔係好多o者！我讓你先喇！』嘩，點解咁好o架！
但最尾我都係拒絕左auntie o既好意，因為真係唔想等…

第二件事就發生於Circle K，我去買奶。
買o左盒964毫升o既維記奶，俾完錢，個阿姐好友善（非商業口吻）咁問我有冇印花咭，我答完佢話冇諗住走啦，點知佢繼續講，話俾張我，買五送一。
真係要多謝阿姐拉住我，張咭對我o黎講…好有用。

第三件事發生o係等lift既時候，故事背景係我左手抽住一大個Reply袋同一袋叉燒飯（送我唔飲o既百事一罐），右手拎住一大盒奶、三封信同一抽鎖匙，看更猛同我講野，左面企o左個聽緊MP3 o既男人。
看更講完o野，隔o黎個男人凝視o左我兩秒，我擺出一副『？』o既表情。佢再指一指我左手個抽o野，我望一望盒叉燒飯，再講望一望佢，我用眼神問佢：『即係點？』，跟住佢終於開金口：『個飯盒歪晒。』
我仲有唔駛三分鐘就返到去，阿男人都咁關心我個飯…

其實做唔做以上三樣o野或者都無傷大雅，但原來做o左會令人覺得有點窩心…