生日願望－中六合彩

我話：「一注獨得六合彩頭獎。」
有人會話：「我都想！」
亦有人會話：「冇大志！」

我何曾講過我要翹埋雙手終日無所事事？又或者係中咗六合彩之後要好似人哋咁貼一個月錢即刻劈砲唔撈跟住去環遊世界？

我嘅出發點並非「貪」。我最怕悶，即使中咗三千八百萬(Yeah!)都好，喺吃喝玩樂嘅同時，我係絕對需要工作去平衡我嘅生活。我發錢寒只係因為我過份居安思危，乜都會預一大個buffer，另外就係好想有一(大)筆好鬆動嘅閒錢可以俾自己做下想做嘅事，實現更多自己嘅夢想啫。當然，有啲嘢唔中六合彩都可以做到，但有時你根本唔會捨得用自己啲棺材本去做...

我滿足現狀，但我相信可以更好。好多嘢，曾經多次諗住豁出去話做就做，但都係行一步退三步，最重要嘅原因都係唔捨得洗錢(所以話橫財嘅意義真係可以好大)。有錢冇錢都好，希望好快可以再踏出一大步扑鎚進行至少一、兩樣！

生日快樂 :)
身體健康 :)
一注獨得六合彩頭獎 :) (死心不息)

詞窮

2010年，鍾一憲推出首支個人單曲《明明》，外間反應麻麻，唱片公司眼見佢一人難橕大局，最後決定買餸搭棵蔥，自此佢就孖住麥貝夷以情侶檔姿態演出，但仍然係半紅不黑，除咗《勾手指尾》之外，相信再冇人講得出佢哋任何一首歌名。

一再翻聽佢哋嘅歌，其實studio版唱得唔差(雖然女方唱live嘅水準飄忽得可怕，但楊千嬅都開得成演唱會啦，仲有邊個唔可以做歌手？)，旋律仲要係幾好聽架喎，咁究竟點解啲歌hit唔起呢？

罪魁禍首係唔合格嘅歌詞，拖累晒佢兩個。以新歌《犯眾憎》為例，作曲同編曲都做得好好，聽過一次我已經曉得哼成首歌，可惜歌詞彷如小學生作文，寫完一堆重點，之後夾硬砌啲字落去令其成文。歌詞中更夾雜住好多類似「玩完」、「走了寶」等唔算口語，但又未去到文采飛揚嘅用詞，導致成首歌處於口語同書面語之間，用詞性質嘅唔一致令歌迷無所適從。

再細心嘴嚼歌詞，會發現一啲好現代化嘅潮流用語。一開始已經殺出一句「他，並未太緊我，我都知道」，「緊我」其實即係「緊張我」嘅濃縮版，平時都唔多聽到人咁樣講，今次好明顯係因為填詞人詞窮，為咗砌字而放落去。Bridge嘅一句「你別再葡萄」成功將歌迷帶到去高登討論區，「葡萄」屬高登用語，取自「吃不到的葡萄是酸的」，屬動詞，有「妒忌」嘅意思。始終呢啲字眼未被廣泛使用，我相信唔係個個都會知道佢哋嘅意思，如果放喺歌入面，首歌發放出嚟嘅訊息又點會被廣泛地接收？定係製作單位嘅target audience只係呢一少撮人？更重要嘅係成首歌係文筆欠佳嘅書面語做base，但又夾雜住口語同潮語，嚴格嚟講根本有三種語言喺度，令成首歌欠缺統一性，一啲都唔順口。

亂塞歌詞其實同亂唱加走音冇分別，始終每句歌詞都係出自歌手自己把口，歌曲質素直接影響歌手留俾人嘅印象，唔係走嘩眾取寵嘅路線，但又冇優美嘅歌詞做情歌嘅賣點，賣點只得瑯瑯上口嘅曲調，除咗吸引到一班書都未讀完，仲會買《YES!》嘅學生哥、學生妹之外，仲會吸引到邊個欣賞？你估十年後仲會唔會有人記得《犯眾憎》呢隻歌？

未達水準嘅歌曲都可以推出市場，難怪香港越嚟越少街知巷聞、老中青都識唱嘅流行歌。除咗歌手本身嘅演繹同唱片公司嘅宣傳之外，旋律同歌詞都係相輔相成，任何一個元素做得唔好都有可能拖垮成首歌。如果鍾一憲想憑呢類賣點欠奉嘅歌曲喺云云歌手中突圍而出的話，除咗喺社交網站繼續發佈男男親密照之外，睇嚟真係要諗諗計。

[圖片擷取自BighonorHK's YouTube Channel]

看不懂香港口語的讀者請按此

性感救貓

前往午飯途中，突然聽到喵喵聲不絕。

眼前某餐廳準備收工嘅女店員抱住隻貓，身旁係另一位手持傳單嘅女同事。隻貓實在太得意，於是我決定行埋去睇下佢哋喺度搞乜鬼。

店員姐姐話阿貓幾分鐘前喺隔嚟店舖嘅帆布帳篷跣腳跌咗落嚟，跟住就見佢拐下拐下咁周圍喵，驚佢整親啲骨，所以抱住佢諗住搵人幫手，但大家聯絡到嘅貓義工都唔近尖沙嘴，似乎冇人幫到手。搞咗一輪，阿貓開始掙扎要走，我話其實佢郁來郁去都面不改容，應該唔會係跌親啦，一路係咁叫應該只係受驚...跟住店員姐姐話其實阿貓同媽媽之前都係喺呢頭活動，提議我哋一齊搵媽媽出嚟，帶阿貓返媽媽嘅懷抱...

冇耐就喺附近一條後巷，大概三、四米高嘅食肆排氣喉同帳篷夾雜嘅位置搵到媽媽！店員姐姐極速搵咗堂梯返嚟。五個參與今次拯救行動嘅人當中我最高，由我抱返阿貓上去。

好嘢！一家團圓喇！

其實我當時真係好驚，地面唔平，堂梯又兀下兀下，我仲要係著住對boot，落嚟嗰陣對腳真係震晒...

同場加映－

如何性感？

食完飯，我同友人講要買褲，因為其實而家著緊呢條已經穿咗窿。友人答我：「我見到吖！」咁即係我高高在梯上嘅時候，地面上嘅四位女士統統都見到啦！

最後要講嘅係我之後去洗手間嗰陣發現自己一直都冇拉褲鏈。成件事真係好性感。

WhatsApp終於要收錢了！請廣傳！

2003年我收過呢個email(下圖已經係email最底部份，上面夾雜住成抽人喺度)：

第一，「Yahoo!」嘅正確寫法應該有感嘆號；
第二，成封email上文下理好有衝突，究竟要forward俾every user、20個user定係10個user？咁如果我個contact list一個人都冇咁點算？
第三，內容雜亂無章，admin講完又到director又講，咁大件事下款加director個名落去咪得，駛鬼出埋admin個名；
第四，成件事個目的係「account verification」而唔係「email passing」喎，咁大間公司點會用啲咁唔到point嘅主旨？

但年少不更事嘅我冇考慮到咁多嘢，天真地轉發咗俾幾個朋友...

時代唔同，假消息嘅出現延伸到去手機網絡。

前排日本地震，網絡上就流傳雨水會有幅射，叫人閂窗兼唔好出街。我想問create/forward呢個訊息嘅人係咪自己都幾日冇出街？老細係咪因為天災呢個不可抗力嘅因素俾咗無限期有薪假你？

臨近打風就會有船務公司內幕消息喺網絡上瘋傳，實牙實齒話打硬風(但第二日又未必真係打得成架喎)。成日都有「內幕消息」流出，間「船務公司」好應該檢討下。

最近連番收到WhatsApp要收錢嘅傳言：

第一，連應該發送乜嘢俾18個人都冇講；
第二，正寫應該係「WhatsApp」，留意大細階；
第三，WhatsApp本身都未提供口語中文，個官方訊息竟然會有口語版本？
第四，WhatsApp Inc.點樣識別到你forward咗個message俾18個人？係咪一定要exact wordings？如果我唔覺意delete咗一個字，或者撳多咗一下space喺最尾，咁又算唔算數？
第五，唔經installation個logo就會變色咁神奇？
第六，成段嘢都冇講明一個確實日子，「明晚」即係幾時？如果個message係早幾日發出嚟，係咪代表已經收緊錢？
第七，「（$25元）每月」屬街市式寫法，好地地一間大公司點會咁寫嘢；
第八，不論係USD定HKD，Android機、iPhone定係任何smartphone，從來都冇$25/月呢個選擇；
第九，當初download嗰陣嘅terms and conditions係咪唔算數？咁大間公司會反口？如果真係咁冇專業操守，就算係免費我都唔建議你用佢嘅服務喇！
最後，source呢？更重要嘅係，點解WhatsApp Inc.唔主動聯絡所有用戶，要靠呢啲方法散播一啲咁重要嘅訊息？

已經過咗幾個6pm，我仍然可以喺WhatsApp暢所欲言。說好的（$25元）每月呢？係咪bill落電話費單度？

以上咁多反駁位，點．解．咁．都．有．人．信？！

假若真係對自己嘅朋友好，請先行用大腦分析一下消息嘅可信性，再決定係咪轉發俾佢哋。咁樣即使你朋友冇腦，都至少有你screen走咗啲假消息，唔會因為你唔經腦胡亂轉發，而造成你朋友，甚至係成個社會嘅不安。

看不懂香港口語的讀者請按此