喺Facebook未出現，大家仲有私隱嘅年代，我非常害怕Xanga subscription呢個function，因為一旦某user subscribe咗我，其他人就可以從該user Xanga上嘅subscription list度link到去我個Xanga度。有人會話：「你可以加friends lock架嘛」，呢點我當然知，但加咗的話又怕朋友次次要login之後嫌煩唔嚟喎，同埋其實留言又係要login，根本照顧唔到非Xanga用戶，加上Xanga個版面好難整得靚，所以唔係太想用。不過歸根究底都係嗰陣寫親嘅都係私人嘢，畀陌生人睇到自己寫嘅生活點滴係一件我唔想發生嘅事，所以我一直都係用緊一啲私隱度(看似)比較高嘅網站。
話說當年讀緊中學，考完會考等放榜，每日無所事事，唔係食就係瞓，見個女同學寫日記寫得咁過癮，於是就加入戰團寫埋一份，就係因為咁，我第一篇日記就喺2003年4月3日喺UDiary誕生，仲記得第一句係「呵呵~今日終於有街出喇!!」
UDiary年代非常簡單，嗰陣互聯網上好多嘢都唔完善，唔係逐個post有comment box，冇得好似而家咁方便撳個browse就可以揀一堆相upload上日記，亦冇得你話撳一下工具列個「B」字就有得將句嘢變粗體...就係因為咁，我學識咗極少量嘅HTML code，例如用img src貼相，#0000FF係藍色等等。但嗰陣要搵地方放相仍然唔係一件容易嘅事，放咗上Yahoo!相簿嘅相又唔可以embed落其他網站，所以日記都係以純文字為主。日記標題轉色、背景圖片都要搵網主Hero幫手，對於我呢啲非IT之人，識整個popup text「歡迎光臨」咁樣已經叫做好叻架喇。至於內容方面，寫嘅當然唔係咩大道理，九成都係非常「日記」嘅日記－記錄一日做過啲咩大小事，去過邊度，甚至有一排我加咗個column寫當日食咗啲乜嘢...話時話，當時仲未有support唔同電腦嘅香港字，要打個「嘅」字？打個細楷「o」再打個「既」字啦！(待續)
 |
| UDiary年代，十篇有九篇都係寫同Josephine(阿實)出街。 以上咁多首Sammi嘅歌，你哋又唱過邊幾首？ |
下集：每日大事記 (下)
沒有留言:
發佈留言