旅遊巴遲到都可以搞到聲淚俱下...當然，你哋可以選擇盡情去恥笑，但我總覺得另一邊箱會有人同情佢。
有個成語叫做「弱肉強食」，但識得扮弱者的話，分分鐘可以扭轉局面成為大贏家。
面對人與人之間嘅爭拗，甲為免令旁人難做，選擇控制自己嘅情緒，擺出一副堅強嘅模樣理性地分析成件事，但好可惜，呢個動作隨時令自己成為失敗者，因為多數旁人都會畀同情心埋沒咗自己嘅分析能力。乙正正就係捉住旁人呢個心理，擺出一副楚楚可憐嘅模樣，將所有情緒無限量放大，喺呢個時候，甲所堅持嘅係是否真理已經唔再重要，大家只會因為乙淒美嘅演繹而動容。
點解要用「演繹」呢兩個字？因為早前有機會畀我親身體驗到飾演乙方嘅喺人前小事化大，哭崩街頭，呼天搶地，成功搏取旁人嘅憐憫之心，但甲同乙單獨相處嘅時候，面對更差嘅情況，乙一滴眼淚都冇流過！舉個例，甲喺人前話乙「嘥氣」，只係因為呢兩個字，乙即刻崩潰嚎哭，看似受盡凌辱，受盡委屈；去到某日甲同乙單獨相處嘅時候再次發生磨擦，甲講咗一番比「嘥氣」兩個字 更難聽 嘅說話，咦，乙竟然可以若無其事，仲曉得駁嘴添，好堅強喎！
所以話，事實上呢個根本就係觀眾人數嘅問題。
識得玩心理嘅弱者，唔單只可以贏到敵人，仲可以呃埋你同我嘅信任。其實金像獎最佳女主角真係唔應該頒畀楊千嬅，我唔係話要畀鄭秀文喎，而係應該畀飾演乙方嘅呢一類人。
[圖片來源：蘋果日報]
1 則留言:
看似堅強的人其實很柔弱，看似柔弱的人其實很堅強，外表往往把人蒙過去。
發佈留言