二千年前後嘅流行曲，其實隨便執一首都會係水準以上嘅作品，就算唱功不足，都有包裝搭夠。能夠曾經活在當年嘅音樂世界，一直都覺得自己好幸福。
喺香港樂壇裡面，能夠令我儲齊所有唱片嘅歌手，除咗鄭秀文，就只有蕭正楠同埋E-Kids。冇錯，係E-Kids。
十四年前，我自己都有好一段日子係金毛，潮流興嘛。
十四年前，未有WhatsApp雙藍剔，科技未係一日千里嘅時候，愛情其實好簡單，你真係會因為幾日冇見一個人而覺得好掛住佢。抱住呢一份真誠，聽《開始戀愛》會覺得好窩心，好甜蜜。
和你看日落逛海灘 (有心不需吃飯)
陪你看電視到五更 (從未渴睡)
和你要日日見算不算貪
太緊會不會散 誰決定緣份期限
可惜嘅係呢個年頭，睇日落嘅最終目的係影相放上網，兩個人一齊睇電視有一個右手會係拎住部電話，WhatsApp嘅出現令到唔駛日日見都唔會好掛住，兩個人真正「相處」嘅時間大大減少，「交流」唔再局限於面對面、手拖手。如今情竇初開，拖到實一實嗰種溫暖已經不復再，咁梗係覺得呢隻歌低B啦！
淺白嘅歌，唔取巧嘅演繹一樣可以帶來共鳴。嗰份雖然淺白，但又夭心夭肺嘅少男情懷，其實冇乜幾多歌手唱到出嚟。
《下學期》嗰份純真嘅少男情懷－
他像我嗎 合格嗎 我妒忌 不爭氣
話結束 便結束 別退縮 相信復合在下個學期
《青春火花》嘅堅強同理智－
和你 要青春繼續燃亮
願昨日飲歌定可再遇上 下一個合唱
同在每日繼續成長 再找方向
《最佳表情》嘅正面－
不要想 你不夠條件趕上
雨下過 也不為特定對象
前路那麼壯闊漫長 誰亦夠格被看上
《第一個唱》嗰份自信－
容我於地球上某處演唱 穿上新裝形像要最閃亮
燈光給我 歡呼我
全場合唱 讓我當主音你和唱
《玩玩具》嗰種憂怨中嘅灑脫－
其實快樂退出不是罪 不怕誰在吻你嘴
若失戀很累 就省一點眼淚
善變的 憑什麼親我嘴
《再見4.1》嗰種淡淡然嘅傷感－
都知我未夠高 只會喜歡你
偏偏我願意犧牲我自己 希望陪住你
化做水蒸氣 滲入你心扉 要共你遊歷遍勝地
《私人時段》嘅治癒－
你要熟睡 戀愛太過痛苦不要說下去
如何累 也別要隱居
誰人待你太狠 你別流眼淚
若然情形如此 怎說話都不對
陪著我笑笑 令你原本的感覺都退去
一班花生友嚴苛地要喺E-Kids身上尋找人生大道理同高層次嘅inspiration，成個方向錯晒。如果忘記Tommy出位嘅行為 (雖然呢個可能係導致E-Kids被針對嘅導火線) ，放低對三伙子嘅會考成績嘅攻擊，放棄喺呢個年頭聯同各大媒體恥笑人哋十四年前嘅造型，細心咀嚼一下呢三個大男孩嘅歌曲，一定會發現值得你欣賞嘅地方。
[圖片來源：Ekids@Facebook]
【我的E-Kids五大】
#5 開始戀愛
#4 下學期
#3 青春火花
#2 玩玩具
#1 私人時段
沒有留言:
發佈留言