現實版Draw Something之POOP

同朋友喺尖沙嘴睇衫。店員嘅style有啲似糖妹，即係cute cute地，講嘢細細聲嗰啲，但冇咗糖妹嗰一份作狀同低能。

一入去已經見到佢個飯盒上面畫咗篤屎喺度，我懷疑係佢同事/朋友/男朋友玩得Draw Something太多所以不期然周圍畫。搞咗一大輪，朋友試緊衫嘅時候，翻版糖妹先驚見糞便塗鴉曝光。

佢故作輕鬆咁拎起檯上面嘅marker，偷偷地喺飯盒上面畫咗幾筆，企圖令上面嗰篤屎消失。

我想講其實我見到晒成個過程...

人渣

潛意識好自然地嘗試搵出合適嘅人選，值得高興嘅係好似淨係得一個人合格咋喎，但「完全唔明白自己當年點解會愛上佢」嘅人倒是有唔少。

我最想知嘅反而係「我是誰的人渣」。

嘩，都係唔打開呢道門為妙...

Neway進化論之你有蔘

Joanne(諗唔到唱乜)：我唔係退化到要唱Twins下話...
我：唱好Twins嘅歌係一種進化。

今日Neway都喺度進化緊。

還記得我唯一一次覺得Neway嘅嘢好食係咸豐年前讀中學嗰陣食嘅一個星洲炒米，之後不論係區區一杯凍華田，定係自助餐嘅食物都難以入口，近年我更加發起停止在Neway進食，次次都係食完嘢先上去，但今次我真係另眼相看。

早一日訂位人頭費九折，每人再送茶餐一份。心諗肯定又係唔凍唔熱，熱變凍或者凍變熱嘅食物，點知西多、雞翼同薯條都OK熱，個西多仲出奇地好食添！

熱蔘蜜嚟到，巡例都會攪一攪。一攪，嘩，竟然有大量蔘片喺度浮游！比起以往得三、四塊，我有啲唔習慣...

突然間覺得$85呢個價錢算係合理。

原來你有蔘...

14:56AM，耶穌問幾點

你高分過我，或者係因為你英文比我好；我高分過你，或者係因為我放字放得有技巧。一場遊戲，贏定係輸其實唔重要，最緊要係玩得暢快。

我唔介意對方渣過自己，自問唔係做每一件事都攞足一百分，但我有啲介意對手係腦殘嘅...

話說前排喺「Words with Friends」搵咗個random user同我玩，佢個username係「xxxxxxxxxxjesus」。當時我已經心諗，咩料呀，耶穌你都搞...

呢個人係咁亂放啲字，不斷為我開路。OK，即使原來你屎過我咁多，我依然好俾心機去玩，雖然我心存疑問佢究竟係咪真係識玩...

一早已經大比數拋離，突然間，假耶穌send message俾我！就憑以下呢段對話，我可以肯定佢真係腦殘之士。

大佬呀！1456點樣可以係AM呀？

常人對腦殘，最後常人以487對204勝出！多謝！

可愛/不可愛，OK/Not OK？

耐唔耐都會留意下7-11或者Circle K有乜嘢換，因為有時啲公仔真係幾得意。加上前排Circle K開始喺Facebook搞活動，唔駛買嘢都有得抽獎，上年年尾我先中咗隻幾可愛嘅箭豬先生，所以一定會多加留意。

今次唔送公仔送「OK Fun包」(印花)。

「迪士尼Pook-a-Looz布藝毛公仔」wall post一出即刻核突聲四起，頂癮o既係一個鐘頭之後Circle K隨即再出post為自己辯護，話「其實Pook-a-Looz係迪士尼人物嘅最新Q版設計，呢個range喺日本大熱」，搞到好似佢講完之後啲網民就即刻會由恨變愛咁喎。

唔理你係Q版定係咩著名藝術家設計，口味呢家嘢人人唔同，唔鍾意就係唔鍾意架啦。同埋之後都有唔少人話啲公仔得意吖，唔駛咁敏感喎！

話說我抽到十個「OK Fun包」，但印花上嘅Fun數一啲都唔樂觀。

都好，留番啲運氣抽好想要嘅嘢！

喂，等我變身先

一日要睇幾次，如果唔係個心會唔舒服。

露娜大頭嗰個shot真係笑到我停唔到(我承認我最近笑點低咗)！唉，所以話點可以立法管制/禁止二次創作呢...

二次創作傷害到咩人？講真嗰句，會唔會有網民見到唐英年個樣俾人key咗落《昂山素姬》張poster上面而唔去睇呢套電影？會唔會有內地人聽完《蝗蟲天下》而討厭陳奕迅、林夕或者Christopher Chak？定抑或會有樂迷聽完《姨婆掉眼淚》之後，覺得歌詞粗俗，而罷買鄭秀文嘅唱片？

答案係唔會囉。

呢個根本就係一個文化，同時仲將原創者打造嘅base發揚光大。「二次創作者」反而係逆向宣傳緊原創嘅作品，分分鐘《唐生冇J》喺Facebook嘅洗版係提醒緊大家仲未去欣賞楊紫瓊嘅演出。

你話喇，最終得益嗰個係邊個？改圖，又或者係舊曲填新詞嗰位又有冇錢收？

不過如果真係要立法的話，記得call定海關喺中學陸運會嗰陣拉人，啲學生好鍾意未問Universial攞版權就填啲好勵志嘅詞落《紅日》度大大聲唱架！

信用卡驚魂

終於都收到呢兩張「新卡」...

話說上個禮拜悠長假期期間，發生咗好多好爆炸性嘅事。

第一爆

事件發生喺2012年3月9日星期五，但其實之前幾日已經發覺card holder唔見咗。

搵勻全屋企都唔見！Replay袋，唔見！車尾箱，唔見！凳底，唔見！爭在未打去之前食過飯嘅地方問啲staff有冇見過。

本想繼續抱住唔搵佢就會自己走番出嚟嘅心態，但基於佢消失嘅時間過長，加上我有張Citibank八達通卡喺入面，如果真係俾人攞咗，雖說膽小鬼未必夠薑碌爆我其他卡，但張八達通真係好難講，是但周圍嘟都可以架喎！

越諗就越驚，所以食完lunch我決定至少報失咗呢張先。之後反正都係接通咗Citibank，於是就順便cut埋張I.T. Visa。

就喺報失卡當日嘅夜晚，card holder出現了。

第二爆

對比起明明唔係想過海，但入錯咗西隧收費區冇得折返，重點係仲要冇錢俾，要第二日特登過去俾番$50...

邊樣震撼啲呢其實？

P.S. 好彩當時冇衝動地cut晒所有卡，如果唔係真係有排搞...

一星期的長假

原始大小

地點只是其次，最重要的還是跟誰在一起。

謝謝你這個星期的付出。

希望你跟我一樣，都是過了一個非常滿足、非常窩心的假期=D

硬膠女店員

我搵唔到一個比「硬膠」更貼切嘅形容詞。

對於呢間甜品店嘅食物，我只會講一句麻麻，今次想同大家分享佢哋嘅服務。

事件一

餐牌喺朋友手上，我唯有空口講白話...

我：我要嗰個荔枝...白酒凍...
女店員：咩嚟架？

我只係講漏咗兩個字，我要嘅係「荔枝啫喱白酒凍」。佢個樣又唔似第一日返工喎！

事件二

朋友發現有隻匙羹上面有粒4mm x 4mm嘅黑色嘢，於是同女阿店員講...

朋友：隻羹污漕架喎，可唔可以換咗佢？
女店員：哦！嗰啲唔係污漕，係墊匙羹嗰塊膠甩出嚟架...

之後全檯六個人同埋女店員靜止咗三秒鐘。

朋友：咁你可唔可以幫我換咗佢？
女店員：真係唔係污漕嚟架喎！(到此時佢仲未有意欲收咗隻羹)
朋友：咁你都幫我換咗佢啦！

最後換番嚟嗰隻都係有嘢黐住喺度...

事件三

22:02落單，其中一位朋友叫咗個N年陳皮紅豆沙，22:24阿女店員行埋嚟話冇晒紅豆沙！

啲糖水擺咗喺對面商廈迷你倉架咩？要用廿二分鐘先確認到紅豆沙賣晒？

事件四

正所謂好戲在後頭，另一位朋友叫嘅心太軟直到22:37埋單都仲未嚟。

男店員心知咩事，講咗唔好意思，同時叫阿女店員叫廚房取消咗個心太軟...

女店員(同廚房講)：10號檯個心太軟唔要喇！
廚房(因為遠所以細聲)：點解？(仲要問囉)
女店員(當住我面問男店員)：點解喎...(竟然真係會傳話囉)

................................................................................................................................................................................................................................................................................................................................................................................................

為咗慳番大家嘅時間，我嗌入廚房：因為已經等咗八個字喇！
最後阿女店員再向廚房補充：因為已經等咗八個字喎...

旺角溏苑女店員－請俾趣。