2012年4月24日星期二

匯豐全新自問自答服務

繼AEON多次打嚟提我找咭數,省卻咗我因遲交而要打去waive嘅時間之後,今次匯豐又提供咗一個好貼心嘅自問自答服務。

話說當年因為貪佢部Samsung數碼相機,所以同時申請咗兩張咭-一張Visa、一張MasterCard。事隔多年,相機已壞(其實係一早已壞),MasterCard已荒廢,唯一仲活躍緊嘅係張Visa咭。

早幾日收到張MasterCard嘅月結單,企圖收取$250年費,例牌又打去waive。我先同接電話嘅女同事講信用咭號碼,之後佢禮貌地同我講信用咭其實唔關佢個部門事,話幫我轉條線去相關部門。

之後接電話係一個男同事。我都未出聲,佢就已經一輪嘴:「收到同事通知,話陸先生想查詢番張MasterCard嘅年費,我哋啱啱已經幫先生做咗豁免...」

答得仲快過SimSimi隻雞。其實我乜嘢都未講,我好似連要waive都未講...

但成件事已經喺我提出要求之前完成咗。


6 則留言:

naruto 說...

佢地都想有得放工呀,仲有一堆電話未聽

Unknown 說...

嗰陣係朝早九點幾咋喎!交更乎?!

匿名 說...

我覺得佢做得好呀,好過有時駁左去第二度又要重新講過一輪確認身份、想要乜

Unknown 說...

都係,但我係奇在佢自問自答啫...

S 說...

我唔係好信獅子銀行囉,我一直有 keep 住佢的信用咭,但已幾年冇簽過,話時話,佢地又好似冇收我年費 ...

Unknown 說...

信用咭呢家嘢,大家互惠互利啫!你係咪waive過一次佢哋懶得再打擾你呀?!

Related Posts Plugin for WordPress, Blogger...