攝影比賽之拋頭露面

最新參賽作品：

LUMIX IT UP 攝影比賽 - START IT UP
Perfect Landing
原帖按此

隨住電子產品嘅流行同埋科技嘅進步，而家真係邊個都可以成為攝影師。

除咗得閒參加抽獎贏下戲飛之外，對影相(完全)冇研究嘅我耐唔耐都會參加下攝影比賽賭下運氣。Upload完自己嘅作品，有時都會想睇下人哋嘅作品學下嘢，點知每次都嚇到差啲抖唔到氣。

而家嘅攝影比賽充斥住一堆連我呢啲唔係專家嘅都睇得出係亂影一通嘅作品，有時仲會出現幾張九唔搭八嘅阿嬸全身照、港女自拍照同埋毒男被偷拍照，上傳者係玩嘢定係真心膠覺得有關照片會得獎我唔知，但呢類騎呢相得獎並唔係個別例子...我真係真係真係真係真係真係真係真係唔係葡萄，唔係唔輸得，只係覺得呢個咩人都有(包括參賽者同埋評判)。

早幾日我先喺度諗，唔知第一張為我帶嚟評判們認同嘅相會係邊張呢？跟住我今日就收到呢以下呢個email：

Yahoo《flickr x海洋公園萬聖萬聖萬萬聖 攝影比賽》活動領獎通知 (節錄)

親愛的Yahoo用戶：

多謝你早前參加《flickr x海洋公園萬聖萬聖萬萬聖 攝影比賽》活動，恭喜你，你將可獲得
海洋公園哈囉喂門票 2 張！

為我帶嚟第一個攝影獎項嘅竟然係自己個樣...

原圖大小仲恐怖

話說主題係「驚嚇相片」，我第一時間就諗起呢張喺2005年影嘅相，點知真係一擊即中。

其實我自己都好驚呢張相，而家睇番個心都仲會寒一寒...

由細抄到大

Compass Visa「估中有獎」是日題目：

一年容易又中秋，係時候買返盒月餅送俾摯愛親朋啦! 今次估下圖中呢隻兔仔係以下邊間嘅月餅盒?

A. 聖安娜
B. 大家樂
C. 香港天際萬豪酒店
D. 港島海逸君綽酒店

貼士在此: http://bit.ly/14i3iUX
得獎者名額：10 名
禮物：~H2O+ aquafirm+ ™膠原活肌泡沫面膜 (價值: HK$390)
遊戲結束時間：2013年9月10日中午12時

有獎抽，梗係咋咋淋參加啦，睇完上面貼士條link，確認係「大家樂」，submit！

貪得意scroll落樓下面睇下人哋答咩double confirm一下，驚見有一大抽人答「港島海逸君綽酒店」！

於是再去條link度睇多次...

明晒，答「港島海逸君綽酒店」嘅原因有兩個：
一、冇腦嘅－click入條link見第一個item係「港島海逸君綽酒店」就當係答案；
二、或者係傻嘅－link都冇睇就照抄人哋錯嘅答案。

所以話，細個嘅時候老師話唔應該抄功課絕對係有道理，或者其實可以抄得聰明啲，「參考」完人哋嘅答案，自己分析下先至交嘅。

一齊參加啦！

[圖片來源：Compass Visa Facebook Page]

屋企樓下遇見熟人恐懼症

一直都以為自己所住嘅地方屬於「山卡啦」一帶，唔怕會以最hea嘅姿態撞到「熟人」，但我漸漸發覺事實並非如此－跑完步披頭散髮會撞到不歡而散嘅「舊情人」，一大清早睡眼惺忪會撞到小學同學...真係熟都由自可，最怕撞到呢啲半生熟，好日唔見一次，連Facebook都未必有add嘅所謂朋友。從此自己喺對方個心入面最update嘅狀態就會係癲佬一個，最可悲嘅係連見都唔知仲會唔會再見，連平反嘅機會都唔會有，咁就一世。

話說早幾年我得閒到喺「惠康為您送」買滿$500嘢等佢送貨，當中包括Super Wash Concentrated Laundry Powder 14.5 kg超大桶洗衣粉，雖然用後感覺良好，但因為兩個原因，所以一直未有機會再買：

一、「惠康為您送」冇得儲日日賞，又(好似)冇得儲信用卡積分，加上我有好幾張現金券，所以堅持落樓下惠康買。可惜我樓下間惠康細到冇譜，莫講話買滿$500，就算$50都有啲難，最緊要係唔知點解佢哋冇呢隻洗衣粉賣；
二、雖然百佳都有超大桶洗衣粉賣，不過係唔同brand，諗住都試下啦，但到我得閒落去掃夠$500嘢嘅時候，竟然冇咗信用卡優惠！咁就梗係唔買啦！

之後某日，我喺樓下惠康諗住買嘢飲，竟然畀我發現久違了嘅超大桶洗衣粉重生！頭先講過啦，喺呢間惠康根本冇可能買到$500嘢等佢送貨，於是惟有自己拎，但其實惠康同我屋企係有一段話長唔長，話短唔短嘅距離...正當我喺微雨下狼狽不堪，行十步換一次手，行廿步停廿秒之際，竟然畀我撞到朋友！結果女友人幫我孭袋，陪住我螞蟻搬家咁去到屋企樓下，我先至鬆一口氣。

今次應該係最狼狽，但亦係最慶幸撞到朋友嘅一次。

硬膠女店員第四集－月費計劃

第三集：硬膠女(男)店員第三集－聖誕大餐

今次係鄉音男職員。

話說PCCW又打嚟R我續約(手提電話4G月費計劃)。個男人鄉音極重，唔講真係會以為係+86打嚟...

鄉: 而家我哋會幫你做番個續約優惠，每個月月費$174就可以有四豬服務... (佢真係講「四豬」架)
我: 埋單$174？包咗隧道費嗰啲未？
鄉: Er...未包隧道費...
我: ..........咁埋單即係幾多錢？
鄉: 連埋隧道費每個月$186...
我: 咁我而家每個月其實畀緊幾多錢? (我真係唔記得)
鄉: $186...

資料圖片 | 攝於2006年1月

我: ..........咁即係同以前冇分別
鄉: 我哋會包十gig數據...
我: 我而家係無限架喎... (我清楚明白而家已經冇無限plan，但聽到個$186 vs $186優惠之後我真係唔想再同佢講嘢，所以是但答佢算數)
鄉: 先生你應該冇留意《蘋果日報》之前發佈嘅「公平使用政策」，其實而家如果你用過咗五gig的話，你嘅速度會變番二豬...

「公平使用政策」會唔會係《蘋果日報》發佈呀！條友係咪亂嚟架！去到呢度我已經冇興趣再同佢講落去，惟有打發佢收線再等佢哋第三次打嚟。

另外有冇人可以提供到手機月費R折攻略？P記係咪$186已經係最抵？要平係咪真係要轉去傳聞中收得好差嘅電訊數碼？

八種令人討厭的演唱會觀眾

尋日《蘋果日報》娛樂版頭條係「尾場個唱自認患躁鬱症，Eason失控狂寸觀眾」，報導指Eason不滿觀眾喺佢演繹慢歌時大叫，同埋淨係掛住影相等等，令佢覺得觀眾唔尊重表演者。對於佢嘅悲慘遭遇我深感同情，姑勿論佢係咪有躁鬱症先至講呢番話，佢的確係有佢嘅道理。

我非常認同作為觀眾，入場睇演唱會應該尊重表演者，更有責任尊重其他觀眾。其實只要遇到以下任何一類觀眾，都足以破壞晒當晚嘅氣氛，令在場嘅你興致大減。

姍姍來遲
「一開始係大牌歌手遲令到觀眾遲，定係大牌觀眾遲令到歌手遲」呢個問題分分鐘仲難答過「有雞先定有蛋先」，呢個惡性循環造成而家八點三嘅紅館只係得唔夠一半觀眾入咗場，八點九都未齊人嘅現像。

歌手加埋準時到嘅觀眾成村人等你入場，唔覺得肉酸架咩？再係咁落去，過多兩年會唔會搞到十點先開得場？

珍饈百味
話說有一次臨開場突然聞到陣酸臭味，追查之下發現原來前幾行有人買咗碗仔翅入場食！大佬呀，食雪糕都算啦，碗仔翅咁大陣味，又易倒瀉，你估你喺屋企睇電視咩！

重點係到開場都仲食緊。

最佳導演
尚且唔談論版權問題，我明白有一部份人根本唔至在欣賞成個演出，在乎嘅只係以有限技術盜錄最多嘅片段放上Facebook話人知「禾今日去睇演唱會巧Ｋaｉ針牙～＊」(跟住又會有一大班智障嘅走去like，明明條片就係濛到嘔，仲要錄晒錄影者啲尖叫聲入去)，但影還影，可唔可以唔好長時間遞到個電話咁高？成個紅館唔係淨係得你部電話嚟睇show架，顧下後面成棚觀眾嘅感受得唔得？

熱愛生命
吹氣棒又好，螢光棒都好，大家都只係想打個拍子hyper下啫！唔好再用吹氣棒篤人哋隻眼，打人哋個頭啦！唔好再舉到隻手高一高fing螢光棒搞到人哋好似隔住個水撥咁睇嘢得唔得？

又唔係跳緊開心舞，可以唔駛咁大動作嘅！

自組樂隊
我真係好想知究竟係邊個發明吹氣棒呢樣咁荒謬嘅嘢，唔環保都不在話下，呢兩碌嘢製造出嚟嘅根本就係噪音，尤其係當呢樣嘢落喺唔識打拍子嘅人手上，會令人誤以為紅館附近有人打樁，真係何其煩擾。同埋其實有啲慢歌係唔需要「BOOM! BOOM! BOOM! BOOM! BOOM!」咁震撼架，連鼓手都唔駛出場，點解仲要有觀眾喺度起勢打拍子？

成個氣氛錯晒，下次唱生日歌嗰陣駛唔駛又要吹氣棒一路「BOOM! BOOM! BOOM!」一路唱？

特別嘉賓
明明睇緊專業歌手嘅演出，無啦啦側邊又多個嘉賓多把聲，容祖兒搞下氣氛開到口叫你大合唱《心淡》就話啫，駛唔駛好唱口到首首都跟住唱咁誇張呀！

我絕對有理由懷疑呢啲人係本身想去Neway但行錯咗去紅館。

思覺失調
今次係陳奕迅唱緊《陀飛輪》有人九唔搭八大嗌Joey，過往亦都見過歌手唱唱下歌突然有女仔尖叫，亦見過有男人喺首歌唱到一半嗰陣好似《怪獸大學》啲怪獸咁怪叫...

香港人壓力係咪真係咁大？

家庭會議
最後一類，亦係最令人覺得煩厭嘅，就係每逢間場，或者台上嘅歌手稍為講兩句嘢，甚至係歌手唱緊歌嗰陣，啲港女、師奶都會不停講嘢，全人類好似廿年冇見急不及待要catch up咁。其實間場音樂/間場片段/歌手講嘢都會有entertaining嘅地方，你未聽過/unplugged嘅歌唔代表唔好聽，你唔想聽亦唔代表其他人唔想聽，忍一陣，靜一靜亦唔代表會有人話你係啞！

最經典係2007年睇鄭秀文演唱會，旁邊嘅兩位妹妹仔由開場傾到《交換溫柔》。如果唔係我噓佢哋，我諗佢哋會傾到完場。

Part 1: Opening
唯獨你是不可取替
Talk
放不低
愛情萬歲
Part 2: X派對
男仕今天你很好
表演時間
一夜成名
Part 3: 抱擁這分鐘
唉聲嘆氣
愛是...
Part 4: 薩拉熱窩的羅密歐與茱麗葉
交換溫柔

結論係當你下次懷疑自己患上躁鬱症嘅時候，應該先諗諗自己近期有冇去過睇演唱會，有冇遇過以上類型嘅觀眾。如果有，可能你患嘅只係「驚見冇品觀眾症候群」，而唔係躁鬱症。好好休息一下，等到演唱會出DVD嗰日你就差唔多完全康復架喇。

[圖片來源：蘋果日報]

每日大事記 (下)

上集：每日大事記 (上)

相信UDiary只係一個小本經營嘅網站，寫咗幾個月，網主Hero突然間話要搬server(如果我冇記錯)暫停一個月，結果一停就停到今日。UDiary年代嘅終結令我無奈咗好一陣子，因為要轉地方係一件好麻煩嘅事，更重要嘅係我唔係日日有backup我啲日記，結果後期嗰十幾篇跌晒落黑洞...

最後，我決定轉投ShowHappy嘅懷抱。ShowHappy初期，已經開始識得screen走啲冇人想知嘅嘢，例如嗰日食過啲咩(雖然一日食三包薯片又真係幾值得寫埋落去嘅)，又或者係同邊個喺行過一個幾普通嘅商場呢類無聊嘢。到中期開始識得從感覺出發去寫嘢，曉得揀一啲非常開心(/唔開心)嘅事出嚟再elaborate一下，當然唔少得加歌下詞兼且bold埋重要嗰幾句(人生必經階段呀)，亦開始加BGM落自己個blog度，印象中第一首放嘅歌好似係《世界之最(你願意)》... 同期亦畀我搵到Photobucket呢個咁偉大嘅網站，日記開始變得圖文並茂，有朋友相、情人相、貓相、零食相、gag相，甚至我爺爺都出現過。後期互聯網發展一日千里，Photobucket唔再有小器嘅容量限制，日記嘅相因此變大，去台灣、去長洲同去Kelly演唱會嘅相有幾張係大大張架！另外不得不提嘅係我畀咗幾廿蚊做ShowHappy嘅VIP，目的係整走頁頂嘅廣告，務求整到個blog靚靚仔仔。可惜有一排ShowHappy個server成日出問題，有時幾經辛苦打完篇日記竟然可以save唔到咩都冇晒，加上眼見Blogger嘅配套同界面好似完善得多，於是做咗一個好大嘅決定－轉blog，轉咗嚟呢度。

其實喺ShowHappy較後期嘅時候，已經開始寫「關於自己」以外嘅嘢，會有朋友講錯嘢嘅金句，會有「給愛搖頭的華納高層之十萬個為什麼」一類懶係抱打不平，講晒大道理嘅文章。不經不覺間，大家撳入嚟嘅地方已經由「日記」變咗做「blog」。大家入到嚟，未必可以知道筆者做過啲咩，知道嘅反而會係筆者想做啲咩，同埋諗緊啲咩。Blog入面少咗自己同朋友嘅私人嘢，例如大家唔會再見到Josephine呢個名瘋狂地出現，亦唔會有意無意知道我某個ex住喺邊度，blog自此可以被公開喇。心態同以前相反，以前慌死人知道自己個blog address，好似天機不可洩露咁，而家由記敘文變做一種分享，反而覺得越多人睇越好。

科技發達，時代進步得太快，Facebook嘅方便令會坐定定，認真諗下自己想寫乜嘅人越嚟越少，各類型嘅blog處於準備被淘汰階段，Xanga壯烈地成為第一件犧牲品。今時今日眼見Facebook嘈喧巴閉，真真假假乜都share一餐，都係閂電腦早啲瞓為妙。

每日大事記 (上)

Xanga宣佈執笠，慨嘆聲音此起彼落。各用户慌忙將珍貴嘅舊entry backup，同時又忙住喺Facebook傷春悲秋，呢頭講完唔捨得，轉個頭拜拜都未講，有關Xanga嘅洗版updates一個禮拜內徹底消失，消失得仲快過早幾年壇花一現嘅再用ICQ熱潮。我的確係有一個Xanga account，但從來冇正式用過。

喺Facebook未出現，大家仲有私隱嘅年代，我非常害怕Xanga subscription呢個function，因為一旦某user subscribe咗我，其他人就可以從該user Xanga上嘅subscription list度link到去我個Xanga度。有人會話：「你可以加friends lock架嘛」，呢點我當然知，但加咗的話又怕朋友次次要login之後嫌煩唔嚟喎，同埋其實留言又係要login，根本照顧唔到非Xanga用戶，加上Xanga個版面好難整得靚，所以唔係太想用。不過歸根究底都係嗰陣寫親嘅都係私人嘢，畀陌生人睇到自己寫嘅生活點滴係一件我唔想發生嘅事，所以我一直都係用緊一啲私隱度(看似)比較高嘅網站。

話說當年讀緊中學，考完會考等放榜，每日無所事事，唔係食就係瞓，見個女同學寫日記寫得咁過癮，於是就加入戰團寫埋一份，就係因為咁，我第一篇日記就喺2003年4月3日喺UDiary誕生，仲記得第一句係「呵呵~今日終於有街出喇!!」

UDiary年代非常簡單，嗰陣互聯網上好多嘢都唔完善，唔係逐個post有comment box，冇得好似而家咁方便撳個browse就可以揀一堆相upload上日記，亦冇得你話撳一下工具列個「B」字就有得將句嘢變粗體...就係因為咁，我學識咗極少量嘅HTML code，例如用img src貼相，#0000FF係藍色等等。但嗰陣要搵地方放相仍然唔係一件容易嘅事，放咗上Yahoo!相簿嘅相又唔可以embed落其他網站，所以日記都係以純文字為主。日記標題轉色、背景圖片都要搵網主Hero幫手，對於我呢啲非IT之人，識整個popup text「歡迎光臨」咁樣已經叫做好叻架喇。至於內容方面，寫嘅當然唔係咩大道理，九成都係非常「日記」嘅日記－記錄一日做過啲咩大小事，去過邊度，甚至有一排我加咗個column寫當日食咗啲乜嘢...話時話，當時仲未有support唔同電腦嘅香港字，要打個「嘅」字？打個細楷「o」再打個「既」字啦！(待續)

UDiary年代，十篇有九篇都係寫同Josephine(阿實)出街。
以上咁多首Sammi嘅歌，你哋又唱過邊幾首？

下集：每日大事記 (下)

不認不認還需認

平時已經有人話我似古巨基。

古巨基 [ 告別我的戀人們 ] x 流浪貓 [ 告別我的主人們 ]


話說早排發現隻貓個甫士同古巨基喺《告別我的戀人們》CD封面擺嘅甫士甚為相似，於是我就整咗上面呢幅圖，放咗上Facebook。

重點係，大家都將重點放咗落「你同古巨基好似樣」度。

更重要嘅係，有一個冇留意古巨基嘅朋友以為CD封面嗰個係我嚟。

事到如今，我唯有認咗佢...係！我同古巨基真係好似樣！

邊忽似啫！

P.S. 呢張已經係2008年嘅陳年舊照，我嘅青春啊...

[古巨基唱片封面來源：YesAsia.com]

- 大家快啲 like 我嘅動物專頁 QuincySuneo's Pet Show 啦 -

一樣米養百樣人．對話篇

#1
話說要幫人買earphone，於是去咗星際，是但入咗一間舖頭。

店員：隨便睇~有冇話想搵啲乜嘢？

我：我自己睇睇先...

跟住我隨即行埋去堆earphone度(背向店員)。

店員：你係Android用定係iPhone用架？

我：Android...

之後靜默咗幾秒，但我又聽唔到腳步聲喎，即係阿店員唔係行緊出嚟幫我啦！於是我擰轉面...

......

............

..................

佢喺度玩緊手機...

#2
路人甲(問佢同行嘅朋友)：「匯豐銀行」個「豐」字點寫呀？

我心諗：你冇嘢下話，呢啲咁大路嘅字唔可能唔識寫/唔記得點寫架喎...

同行嘅朋友：「蘇民峰」個「峰」嘛~

#3
距離朗豪坊幾個街口嘅小巴上...

我(大聲)：司機，最近朗豪坊應該喺邊度落呀？

司機(大聲)：朗豪坊囉！嗰度有站！

半分鐘後...

一個一直冇聽緊歌冇玩緊手機冇瞓緊覺嘅乘客：朗豪坊有落！

去驗耳啦！

#4
講緊分手原因...

路人甲：佢一腳踏兩船。

路人乙：佢係同你拍緊拖嗰陣定係散咗之後先一腳踏兩船？

#5
晚上嘅越棧...

客人：唔該可唔可以畀啲花生醬我呀？

我心諗：吓？晚市食咩要花生醬？就算tea time都好似淨係得河粉，冇多士架喎！

店員(無奈地行埋去)：先生你係要咩話？

客人(手持點串燒嘅sauce)：Er，我想要多啲花生醬...

店員：哦...沙嗲醬...

最強的弱者

旅遊巴遲到都可以搞到聲淚俱下...當然，你哋可以選擇盡情去恥笑，但我總覺得另一邊箱會有人同情佢。

有個成語叫做「弱肉強食」，但識得扮弱者的話，分分鐘可以扭轉局面成為大贏家。

面對人與人之間嘅爭拗，甲為免令旁人難做，選擇控制自己嘅情緒，擺出一副堅強嘅模樣理性地分析成件事，但好可惜，呢個動作隨時令自己成為失敗者，因為多數旁人都會畀同情心埋沒咗自己嘅分析能力。乙正正就係捉住旁人呢個心理，擺出一副楚楚可憐嘅模樣，將所有情緒無限量放大，喺呢個時候，甲所堅持嘅係是否真理已經唔再重要，大家只會因為乙淒美嘅演繹而動容。

點解要用「演繹」呢兩個字？因為早前有機會畀我親身體驗到飾演乙方嘅喺人前小事化大，哭崩街頭，呼天搶地，成功搏取旁人嘅憐憫之心，但甲同乙單獨相處嘅時候，面對更差嘅情況，乙一滴眼淚都冇流過！舉個例，甲喺人前話乙「嘥氣」，只係因為呢兩個字，乙即刻崩潰嚎哭，看似受盡凌辱，受盡委屈；去到某日甲同乙單獨相處嘅時候再次發生磨擦，甲講咗一番比「嘥氣」兩個字 更難聽 嘅說話，咦，乙竟然可以若無其事，仲曉得駁嘴添，好堅強喎！

所以話，事實上呢個根本就係觀眾人數嘅問題。

識得玩心理嘅弱者，唔單只可以贏到敵人，仲可以呃埋你同我嘅信任。其實金像獎最佳女主角真係唔應該頒畀楊千嬅，我唔係話要畀鄭秀文喎，而係應該畀飾演乙方嘅呢一類人。

[圖片來源：蘋果日報]

看不懂香港口語的讀者請按此

熊家輕鬆熊家猜之$20現金券

久休復出。

喺大家仲未沉迷喺smart phone，仲係冇咗電腦會死嗰個年代聽過一個講法，話千祈唔好兜口兜面鬧hang緊機嘅電腦，因為啲電子嘢會同你玩對抗，你對佢唔友善的話，結果就會係越嚟越hang。以上說法信不信由你，但其實我試過好幾次躁狂怒拍CPU，跟住由明明開唔到機變開到機，之後仲要係暢順無阻。

不過有時有啲嘢真係要鬧下先至會OK。

話說近來日日都會上Facebook玩7-Eleven嘅「熊家輕鬆熊家猜」有獎遊戲(好一個爛名)，由於過往有輕易得到小禮物嘅經驗，所以對於今次日日都只係中人人有份嘅爛鬼coupon(例如思樂冰+$1多一杯，我要咁多杯做乜鬼)顯得有啲唔耐煩。

某日早上，我同友人講咗呢個情況。

一分鐘後，畀我抽中咗7-Eleven $20現金券(名額500個)。老實講，我想要現金券多過隻26吋鬆弛熊。

物價高漲，今時今日$20可以喺7-Eleven買到啲乜？

黑貓與基佬

這邊箱，她的兒子是一個同性戀者，思想守舊的她視之為災難，遲遲不肯接受，所謂「至親」的母子關係因而變差。

那邊箱，他昨天遇到了一頭黑貓，迷信的他視之為不幸，整天心神彷彿，最後忙了看紅綠燈就過馬路，差點給車子撞到。

那到底這是貓的錯還是人的錯？是否要為黑貓換上新的皮毛？

迷信的他說：「我愛貓，包括黑貓，但接受不了黑貓帶來的霉運。」

沒錯，或許他真的很愛貓，只是那份所謂的「愛」不夠大罷了。

[Picture grabbed from Erin Stacy@Flickr]

買薯片還是買WhatsApp

WhatsApp嘅出現，令到大家唔需要再顧及發送跨網短訊(SMS)嘅收費問題，亦為大家帶嚟一系列比SMS更多嘅功能，包括圖片發送、群組聊天等等。正當WhatsApp方便到大家開始濫用嘅時候(辭職都係用WhatsApp？)，突然傳來WhatsApp開始向Android用戶收錢嘅消息。

唔少用戶對年費US$0.99呢個數字非常敏感，認為唔應該收費。其實自有智能手機以來，眼見一個二個又話要jailbreak，又話要root機，務求免費享用晒App Store/Google Play入面每一個app，我一直都好想問一個問題：畀得起幾千蚊買部電話，畀得起二百幾蚊嘅電話費，點解唔可以花多幾蚊買個app？年費US$0.99(~HK$7.72)，每年食少包薯片都喺番度啦！

正如我喺「偷歌賊」入面所講，「冇錢」根本唔可以作為拒絕付費購買嘅理由，冇錢仲有咩資格學人享受？再者，每一個app嘅developer都付出過心機同時間去寫一個app，人哋都要開飯，畀錢去買一個app係對佢哋最基本嘅尊重，亦係每一個用戶嘅責任，更何況呢個係一個你自己都欣賞，都覺得實用嘅app。

不過話雖如此，又未必係個個都咁欣賞WhatsApp。有人話WhatsApp耐唔耐就hang一次，唔好用；有人話Apple手機畀一次錢就可以一了百了，但Android機就要畀年費，唔公平(我又覺得唔同system，雙重標準還可以接受)；有人話明明仲有七日免費，但就已經send唔到message(如果屬實，咁呢樣又係WhatsApp唔啱喎)；亦有人話其他通訊app都唔駛收錢，點解WhatsApp要...

各位怨氣重重嘅用戶，既然你哋覺得WhatsApp咁爛，咁仲唔快啲轉用LINE？點解仲要為收費問題同一個自己鄙視嘅app糾纏？定係你根本就係覺得好留戀，唔捨得放手？

係的話就唔該合埋口，攞信用咭出嚟，畀錢罷啦。

[圖片來源：Google Play]

陳慧琳應否斬雞？

又係YouTube。

繼早前鄭秀文轉唱腔備受投訴之後，今次輪到另一位天后陳慧琳。新歌《So Hot》嘅宣傳短片以「hot」為題，為求做到hot到癲嘅效果，片中嘅Kelly又食麻辣火鍋，又隊辣椒，表情浮誇到爆燈。條片曝光之後，又惹嚟一堆難聽嘅說話，話個宣傳手法低劣之餘，又話Kelly一把年紀先玩埋晒呢啲嘢呃奶粉錢，投訴聲音此起彼落。

條片屬entertaining定係annoying真係見仁見智，但我個人認為呢段片完全冇問題。第一，Kelly絕對玩得起呢一種crazy嘅風格；第二，大家睇下以下呢條片：

陳慧琳斬雞！睇下佢個激動樣！

試問有邊個天后嘅級歌手會不顧儀態喺螢幕前做呢啲嘢？大家淨係記住佢喺《有福氣》入面嘅高貴形象，同埋喺《失憶周末》一類舞曲入面嘅型格造型，卻醒唔起陳慧琳深得民心嘅主因係佢唔怕蝕底，咩都肯試。《點解你係咁》同《你這個男人》呢類玩味咁重嘅歌，真係只有佢先唱得出嗰種bitchy而不MK嘅味道，換轉唱《Phone殺令》嘅係第二個，應該晨早已經俾人話白痴兼低B。

喺互聯絡呢個虛擬世界入面，每個人都可以不記名，不負責任地留下最毒辣嘅字句，唔理佢哋係真心覺得條片唔好睇，定係因為偏見先發噏瘋，總之一句到尾－認真你就輸了。

[圖片擷取自universalmusichk's YouTube Channel]

一分錢，一分貨？

某日婆婆對住茶樓一籠點心講：「唉，而家啲人做嘢越嚟越『那西』，出街想食啲辣口嘅嘢都冇！」

我非常同意婆婆呢番說話。我唔係一個專業嘅食家(雖然部份食家都只不過係吹水唔抹嘴)，但我相信我自己嘅感覺絕對可以用嚟做標準。少至一籠燒賣，大至一碟意粉，先唔好談論味道係咪適中、係咪過鹹、有冇落得太多味精，第一個關口其實係溫度。凍過壽司的話固之然要退貨，咁如果係室溫或者偏凍呢？大部份人會話由得佢，但你估樓下麵包舖買腸仔包咩，唔凍唔熱，唔熱嘅飯餸邊度好食架？

可悲嘅係接受咗飯餸非熱食呢個殘酷嘅現實之後仍然要繼續過關斬將：

我話：個湯咁鹹嘅！
有人話：由佢啦，都唔係好鹹啫，仲接受到...

我話：啲飯淋過軟飯喎！
有人話：由佢啦，都唔係好大問題啫...

我話：隻雞好似未熟喎！
有人話：由佢啦，唔好食未熟嗰忽囉！

有趣嘅係，口口聲聲話接受到嘅人，都係食淨一大半架喎。

我話：杯cocktail好耐都未到喎！
有人話：由佢啦，今日爆場嘛！等多陣啦...

結果有一次杯嘢喺落單後四十五分鐘都仲未到(催過三次)，最後話cancel嗰陣仲要俾阿Outback waiter黑面，請問我做錯咗啲乜嘢？

更恐怖嘅係而家好一部份食肆喺繁忙時段竟然設有限時，要求客人喺一小時三十分鐘內落單、用餐、傾偈、抹嘴、埋單同走人，坐監放飯咩！

仍然有人會話：由佢啦，我哋之後去第二度飲嘢...

去到呢個位，我想問，溫度、味道、速度、服務、用膳時間統統統欠奉，餐二百幾蚊嘅飯價值喺邊度？

過份嘅忍讓造就咗本地食肆得過且過嘅作風，不求質素，只求有嘢俾你食，食完唔該快啲走好讓佢哋可以做多轉。如果再係咁落去，恐怕食肆嘅質素只會繼續退步，到時先後悔搵唔到一間體面嘅食肆就已經太遲，所以如果問題真係太嚴重，我仍然會選擇出聲。在乎食客(在乎生意)嘅食肆絕對會虛心聆聽，加以改善，如果因為咁而對食客黑面，又或者係投以歧視眼光的話，真係唔去都罷。

資料圖片：八爪魚軍艦、四合一炸帶子壽司(2006)

後記
詭異嘅係大家對以上每個不足都作出咗極大嘅包容，但當提到大家樂加價幾蚊嘅時候就媽聲四起，正所謂「一分錢，一分貨」，點解二百幾蚊一餐問題飯可以得到包容，反而幾十蚊一餐嘅大家樂要被圍攻？再講，其實大家樂嘅質素真係唔算低...

相關文章
More Than Customer Service - Fat Angelo's
硬膠女店員
硬膠女店員續集－冇汁撈麵

硬膠女(男)店員第三集－聖誕大餐

以貌取醫生

生日(29號)開始作病，磨到2號頂唔順終於要去睇醫生。打俾御用神醫諗住預約，點知冇人聽，電話錄音都唔多個，但仍然天真地照去博一絲希望，去到當然係摸門釘(notice都唔多張)。其他西醫其實真係同我唔多夾，通常都醫我唔好，但如今就嚟連聲都開唔到，點都要喺附近是但搵個睇咗先。

入到去，見到一個幾後生嘅姑娘，之後佢俾咗張正方型嘅廢紙我填資料，上面用典型女生字體寫住「Name:」同「Address:」兩個字。用廢紙唔係問題，環保嘛，但點解唔用電腦印，整得體面少少...填完之後望多姑娘一眼，原來佢件衫上面有幾粒鍋釘，潮人嚟架喎！

冇耐，姑娘俾咗呢張「覆診咭」我...

點解連覆診咭都懶得印架！我開始懷疑自己去錯地方。

潮姑娘有禮貌地話要等一陣，醫生喺地鐵站行緊返嚟，於是我一直留意住，諗住睇下醫生係咩靚仔樣。希望越大，失望就越大，縮水皺皮版于洋經大門步入診症室。

醫務所面積好細，我喺出面都聽到醫生同病人一號嘅對話，內容離唔開大陸同雅居樂，好似唔多聽到有講病情...呢個時候，我再次懷疑自己去錯地方。我開始想離開另覓醫生，但我最後都說服咗自己唔可以以貌取人，冇覆診咭並唔緊要，手寫application form都冇相干，最緊要係識去雅居樂嘅同時識醫病嘛，話唔定人哋醫術高明呢！

諗得嚟都到我喇，入到去，我一五一十咁將我嘅病情講俾醫生聽，可惜 兩度 喺 亳無先兆 下被醫生打斷，佢用大聲浪穿過我嗌出去同姑娘解釋前一位病人嘅病情，仲要係有問有答，唔只一句架喎！我話知嗰個係你啲VIP定係你阿媽啦，可唔可以俾啲禮貌照顧咗你眼前嘅病人(客人)先呢可！

我用我僅餘嘅EQ唔去鬧佢，而我今次唔以貌取人嘅決定，換來嘅就係我到今日都仲未好番。

我確認自己去錯地方。

P.S. 潮姑娘最後有禮貌地用雙手找錢俾我，叻喎~